Na faafetaia e sui a le Le Lagoto Beach Resort & Spa i Savaii se fesoasoani a le malo sa foai mo le auaunaga e ala i se tino i tupe e $48,000 sa tuuina atu e faamamaavega i aafiaga o le koviti-19 lea o loo tapunia ai alavaa ma tagata tafafao mai fafo.
E lima miliona tala ($5,000,000) le aofai o le fesoasoani a le Malo o Samoa sa faasafua ia Tesema 2021, i pisinisi e 150 o loo galulue i auaunaga faaleturisi e pei ona faasalalauina e le Minisita o Tupe, Toeolesulusulu Cedric Schuster.
O lagona o le fiafia sa faaalia e tauala mai i sui sinia o le faletalimalo i se feiloaiga ma le vasega o tusitala, o ualesi ma faasalalau, faatasi ai ma sui mai le pulega o turisi ma tagata tafafao maimoa mai fafo.
Sa mafai ona faasoa mai le fetalaiga ia Mata’ia Seti ua 73 tausaga o lona soifua ae ua silia ma le 20 tausaga talu ona faigaluega i le Le Lagoto Resort & Spa, faapea foi ma le tamaitai ia Malele Seuamuli Poai ua ova ma le 15 tausaga lana tautua.
Sa laua momoli le agaga o le faafetai i le Malo ona o le tali mai i nei fesoasoani ao iai nei pisinisi tau turisi i tulaga pagatia ona o faama’i ua tapunia ai femagalaiga. Sa faailoaina e Matai’a Seti, o a’afiaga pito sili ona ogaoga, o le faavaea lea o tagata faigaluega a le faletalimalo.
“E 56 le aofai o matou tagata faigaluega sa iai. E lua sifi sa vaeluaina aua e cover taimi uma o le aso i lenei auaunaga, ae peita’i o le taimi nei, e na o le toatolu lava matou lea e faigaluega i le taimi nei..
“Ua le o toe tutusa matou totogi o toe maua, aua ua leai ni turisi, ona tuuitiitia ai foi laia ma itula faigaluega..
“E faapena foi le aafiaga i le pulega ma le faletalimalo, aua ua faaletonu tupe maua e faasoa mo le totogiina o pili eseese a le pisinisi e ao ona totogi.”
O le molimau a Mataia, a faaletonu le auaunaga a faletalimalo, o le tele foi lena o le aafiaga mo auaunaga eseese lea e faatau mai a latou oloa i le Le Lagoto. E tele le fesoasoani a le faletalimalo, e atiinae ai le tele o auaunaga latou te faatau mai ai. O auaunaga e pei o le au faipese, o au siva, o fualaau aina toto ma tulaga uma e faaogaina e le faletalimalo, sa masani ona faatauina mai nisi o le mamalu o le atunuu.
“Ua le maua atoa foi lava e le toatele o nai a matou suppliers se seleni, ina ua faaletonu le tupe maua a le faletalimalo.”
Saunoa le tina ia Malele, e na o le faleaiga lava lea e tatala mo taumafa, e mafai ona faatonu mai, ona piki lea mo le fofoga taumafa a le mamalu o le atunuu. Ua mafai ai foi ona okaina keke o aso fanau, i le bakery ua faaopoopo iai le auaunaga a le faleoloa i le taumafaiga lava e sue nisi pisinisi e faaauau ai le auaunaga.
Sa taua e Malele, e le o toe tatalaina le auaunaga a le Le Lagoto mo faaipoipoga poo reunion, ona ua maitauina le tele o vaega sa faaleagaina ma toe’esea i faamoemoe sa faatinoina muamua. “O loo tatala lava le avanoa mo fonotaga ma malaga o polokalame, e pei o matagaluega a le Malo, o faalapotopotoga tumaoti ma isi.”
Na saunoa foi lenei tina i le aafiaga o tupe maua a le faletalimalo. Ae le’i aafia le atunuu i le faama’i, e latalata lava i le afa miliona le tupe maua i le tausaga, pe a faatusa atu i le $50,000 i le tausaga lea ua iai i le taimi nei. I le taimi nei ua le toe iai ni tagata tafafao mai fafo, ae ua na o Samoa nei o loo taumafai e maua ai ni a latou booking.
“O le matou taimi pisi lava sa iai, o le masina o Iulai aua o taimi na o le malulu o atuunuu i fafo e pei o Ausetalia ma Niu Sila”. Sa ia taua, e faasolo mai ai lava le pisi poo le high peak season lena seia oo mai i le faai’uga o le tausaga.
“O taimi foi lena e amata ai loa ona malaga mai turisi ae maise o nai o tatou tagata e tafafao ma asiasi mai.”
O le tatalo a nei sui sinia a Le Lagoto, talosia ae vave ma’ea le faama’i ona toe sologa lelei lea o nei ituaiga atina’e e maua ai galuega a tagata, ma toe si’itia ai foi i luga le tupe maua a le faletalimalo, ma toe foi mai ai le toatele o le aufaigaluega, ma toe faafoi ai le lelei o totogi o tagata faigaluega aua le tausiga o aiga, nuu ma le ekalesia.
