Ua faaleo se agaga faafetai a le faiaoga ta’iulu o le au Manu Samoa 15 ma lana pulega e tusa ai ma le tapuaiga le atunuu.
O le Manu Samoa 15 lea ua siamupini nei i le PNC – Pacific Nations Cup, ina ua manumalo i ana taaloga e tolu o lenei taamilosaga. Sa muamua manumalo i le 31-26 i le au a Ausetalia A, sosoo ai ma le manumalo ia Tonga e 34-18, ma le taaloga mataina mulimuli o le taamilosaga, sa manumalo ai ia Fiti i le 23-20.
I se faatalanoaga ma le vasega tusitala sa saunoa ai Vaovasa, “e momoli le faafetai tele i le atunuu, faafetai Samoa ona o le tapuaiga a’o alo tama fanau o le au lakapi e tauina le taua aua se ai o Samoa..
“Faafetai Samoa, ua iu ma le manuia taaloga, faafetai lagolago mai, faafetai mo talosaga..”
Na fesiligia le afioga ia Vaovasamanaia i se tapenaga, ae poo a foi ni liutau poo ni itu e faaleleia i le feagai ai ma le au. Ae na saunoa le faiaoga, e tele se galuega e ao ona toe galulue iai – e pei o le faaleleia lea o nisi o vaega sa maitauina na faaletonu i le taimi a o faagasolo le taamilosaga, e pei o set pieces, ma toe lifi i luga le tulaga o le osofai (level of attack).
Na fesiligia foi sona finagalo i tatou local players, peitai, na ia saunoa, o le faaletonu o le taimi nei o le leai o ni a tatou taamilosaga e piki mai ai tama taa’alo.
“O le faafitauli e le o iai ni taamilosaga 15 e mafai ai ona fili mai nisi ua lava tapena mo le Manu Samoa 15..
“E le mafai la ona omai sao loa i le maualuga lea iai tama taaalo, aua o le tatou au, sa filifili mai taamilosaga o le Super Rugby, faapea ma taamilosaga i Europa ma Amerika..”
Saunoa Vaovasamanaia, o loo iai lava le avanoa pe afai e mafai ona ausia se tulaga maualuga o le faatinoga o le taaloga, i taamilosaga i totonu o Samoa.
O se mitamitaga i le au atoa faapea le pulega, o le siamupini lea i lenei taamilosaga, aua ua leva tausaga e lei toe oo Samoa i le siamupini, aemaise o lea faatoa manumalo Samoa i totonu o laufanua o Fiti, talu mai le tausaga 2014. O le tausaga mulimuli foi lena sa manumalo ai le Manu Samoa ia Fiti, ma manumalo ai foi i le PNC.
Talu ona faatino le PNC, lea faatoa faafa (4) ona manumalo Samoa (2010, 2012, 2014, 2022). O Fiti, e faalima ona manumalo (2013, 2015, 2016, 2017, 2018). Na manumalo Iapani i le 2019, ae leai ni taamilosaga na faatino i le 2020 ma le 2021.
I le taimi nei o loo faata’ape le au ae o le a fuafua o le a toe tuufaatasi le Manu Samoa 15 i le masina o Oketopa e tapena ai mo le tour poo le Malaga taamilo i Europa.
O le pulega a le Manu Samoa 15:
Vaovasamanaia Seilala Maposua (Head Coach)
Mase Mahoni Swalkger (Scrum / Set Pieces Coach)
Faalogo Tana Umaga (Defence Coach)
Andrew Goodman (Attack Coach)
