28 Aukuso 2019, Apia Samoa.
Sa faia se faatasiga faapitoa e momoli atu ai le faafetai tele a le Minisita o Aoga le Afioa ia Loau Keneti Sio mo Aoga Tulaga Lua uma sa tapenaina Vii o Atunuu taitasi na aua mai mo Taaloga a le Pasefika na tali malo ai Samoa.
O lana saunoaga autu lea ua lolomi atu i lalo:
O lea ua mae’a ona momoli lapalapa o malo e tusa o le tatou va tapuia ma le Atua i lenei taeao, e momoli ai le fa’afetai tele i lau Susuga i le Fa’afeagaiga, e tusa o lo tatou sao ia manuvao, aua so tatou manū to mai lagi mo Samoa ma ona tagatanuu uma mo a taeao.
O le matou tatalo ia saga utu pupuina fulu o le segaula, maua lau lauga ma ia maua ni agaga se tele auā le Atua ma lona finagalo, ma ia tau ia o se fatu e pau i se ‘ele’ele lelei ia tupu ma ola auā tupulaga lalovāoa.
Ae o paia o lenei taeao o le a e’e pea ia i va’atapuia ae fata i mauga o ao ou paia sausaugata Samoa. Auā e faigata o oe o le i’a iviivia. O le fale foi e tulutulu i tao ua soo ona taiao. O paia auā o lea ua Afifio mai ma tala mai o aao i suli ma feoi o Tama ma o latou Aiga, Aiga ma a latou Tama, le Usoga mamalu a Tumua ma Pule, Ituau ma Alataua, Aiga i le Tai ma le Va’a o Fonoti, Saole ma Saleaumua ma le launiu na saelua, To’oto’o o le Faleula, fa’apea Tama a le Manu’a tele.
E le fa’agaloina foi le tapuaiga malu i Auauna a le Atua o lo o fa’afalelemalu i fata faitaulaga e fia auā le asuina o le ipuvai o le ola i Ekalesia ‘ese’ese i totonu o si o tatou atunuu.
O le “Adopt a Country” o se polokalame na tu’uina atu e na o le ono (6) lava masina e vaetamaina ai atunuu taitasi sa o tatou talimalo ai e tapena fuafua i ai vaega lautogia e pei ona i ai, le usuina o tagavai o ia atunuu, faafiafiaga a le atunuu, atoa ai ma le siosiomaga atoa o le aoga lava ia ina ia foliga le fanua ma le aoga atoa, pei lava o le atunuu moni sa ola ma soifua a’e ai.
O le afuafuaga lava lea o le flag raising, poo le sisiina a’e o tagavai e pei ona molimauina i Tiafau, atoa ai ma le tatala aloaiaina o taaloga e pei ona sa faataunuuina i le malae taalo i le Apia Paka.
Ua le manofonofo le Kapeneta ma le faigamalo, aua ua lagona le agaga o le faageetia, ae o se mitamitaga i la outou Minisita ona o la outou faatinoga e le’i faapaole.
O le mea moni e le faigofie, ae o la outou talilumafale, ua fanau mai ai le anoanoa’i o isi fuafuaga lelei ma tapenaga uma e pei ona feagai ai ma taaloga a le Pasefika.
Ae o lenei itu aso o lea ua fulifao le vaa o mala ae fulialo le vaa o manu. Ua le manofonofo le fia Falealili fua i au tiuga ma au teuga faatupu ma le faatamalii e pei ona silamio i ai Samoa i ana taaloga faava o malo e pei ona se’i mavae atu nei.
O lea, le vasega e, o Asiasi Aoga, Pule Aoga, Faiaoga faapea le fanau Aoga, malo le tautua Matagaluega, Faafetai le faaea atunuu. Ua outou faia lava e outou mea silisili ma outou manumalo a’ia’i ai lava.
O upu moni e lei faigofie lo outou taupati mai, ina ia tau lau o le faamoemoe. A lea ua tau le ai o tapalega, lea ua atoa tino o Vaatausili e pei ona molimauina e le lalolagi, aemaise o tatou atumotu a tuaoi. Faamalo le loto atunuu, faafetai le tautua malo.
E le faagaloina le tapuaiga a matua faapea le paia i laumua taitasi, aua e talitonu le taofi, i tua atu o se Aoga lele o loo saofai mai ai le saofaiga a ni matua lelei, faatasi ai ma se Afioaga o loo pulea e ni matai ma se Komiti aoga lelei tele.
Ia saga faatutumu e le Atua la outou utu aua le feagai ai ma valaauina, ia saga faatumauina pea le teuteuina lelei o tatou faleaoga taitasi ina ia matagofie pea Samoa e pei ona i ai a tatou taaloga. Manuia fanau a Samoa mo le lumanai.
Ia faatumauina le manulauti e pei ona tauaveina i taimi o taaloga a le Pasefika o le “One in Sprit – Tasi le Agaga” e faataunuuina uma ai o tatou faamoemoega uma i le faatasi mai o le Atua.
Faafetai ma ia manuia tele lenei aso
Soifua.
(12)
