E 66 tausaga o le tama ia Tuumatavai Tu’uga Lauama, mai le afioaga o Nuu Fou ma Safa’i i Savaii, ua faamanuiaina nei i le se’i a le Digicel.
I se faatalatalanoaga ma le tamā ia Tuumatavai, na ia saunoa ai o le taimi muamua lea ua maua ai se taavale a si o latou aiga.
“Faafetai tele i lenei auaunaga o le Digicel Samoa, ua maua ai lenei faamanuiaga tāua mo a’u ma si o’u aiga.”
“O se fiafiaga tele lea ia te a’u ona ua maua se taavale e fesoasoani ai i le faatinoga o la’u galuega; aemaise o le fanau i aoga ma feau masani i totonu o le aiga.”
Tā’ua e lenei tama, e $150 lana tupe na alu i le faatauina o ana card poo top up o lana telefoni.
O le piki apu o le Ford Ranger, lea na faalauiloa i luma o le Ofisa o le Digicel i le NPF Plazza, lea ua manumalo ai le tamā o Tuumatavai.
Saunoa le tamā, sa sau lava i Apia ina ua valaau atu le kamupani o le Digicel. Afe loa i si ona afafine o loo faigaluega i le NPF, e la te ō faatasi.
Sa faagoi loa si ona afafine ma la agai atu loa i le se’i a le Digicel. Ina ua la taunuu, ona ave loa lea o ia i lona nofoaga.
O le tala sa tuuina atu ia i latou uma nei ua maua faailoga, “tago i lalo o lou nofoa o loo iai le faamatalaga o le togi ua e faamanuiaina ai..”
Faapea mai le sui o le Digicel, “E tatala atu loa lau pepa o le taavale lenā ua e manumalo ai, ona e tiususu loa lea ma e faailoa mai.”
Molimau le afafine o Tuumatavai, o ia ua faateia ma ua lē mafai ona taofi ona loimata, ina ua vaai atu ua tiususu mai si ona tamā ma faailoa mai, o ia lea ua manumalo i le Ford Ranger.
O lenei tamā, e toafitu lana fanau e aofia ai si ona afafine lea sa la o atu. O loo galue o ia o se kamuta faufale.
