Faafaigofie e le EPC ma le Digicel ona Top Up lau Cash Power mai Telefoni Feaveai

Ua faafaigofie nei e le Digicel ma le EPC le faatauina o le iunite mo le eletise, ona ua mafai nei ona faatino i luga o lau telefoni feaveai.

O lenei auaunaga fou ua taofia ai le tau tu i le laina e faatau le cash power, poo le tau alu i se fale o loo faatau ai le cash power pe a tulai mai le uma o iunite.

O se faigapaaga a ia kamupani teteele i le atunuu ua fausia ai se polokalame e mafai ai ona faaoga le Mobile Money i luga o lau telefoni e top up ai lau cash power.

O le afioga ia Lupematasila Tologata Tile Tuimalealiifano o le Malosiaga Faa Eletise fatasi ai ma le Pule Sili o le kamupani telefoni o le Digicel ia Farid Mohammed sa ia faalauiloaina lea auaunaga i le taeao ananafi i le ofisa autu o le kamupani telefoni.

Na taua e le Alii Pule o le Digicel na tupu a’e lea manatu ina ua vaaia le toatele o le mamalu o le atunuu, e tofu uma ma  telefoni feavea’i, ma o i latou foi ai o loo faaogaina le eletise totogi muamua poo le prepaid cash power.

Sa faailoa mai o le EPC sa aumaia lea auala fou ma lagoalago loa iai le Digicel e ala i le faaoga ai o le Mobile Money e mafai ai ona totogi le iunite.

Na faailoa talu ona suia le auaunaga i le 4G atoa ai ma le oo mai o le Tui Samoa Cable, ua tele lava le suiga i le faaogaina o lea auaunaga i totonu o Samoa nei.

O le mafuaaga ua faatuina ai lenei faamoemoe, ina ia faafaigofieina ona maua le eletise totogi muamua.

E le nao le pau ai lea, e mafai foi ona tala mai se tupe mai lau teugatupe i le National Bank ma tuuina i le Mobile Money ma faatau ai loa au iunite e faaoga iai le telefoni.

O le tulaga e sili ai ona lelei lenei auaunaga e pei ona taua ona pe leai se data o lau telefoni e mafai lava ona e faaogaina le EPC App ua tapena nei, e faatino ai le auaunaga lenei.

Na taua e le alii Pule Sili o le Digiicel e utiuti lava le avanoa o debit ma credit card o loo iai i le maketi i le taimi nei ae maise i Samoa lava ia.  O se auala la lea e unai ai le faaogaina o le initaneti e fai ai fefaatauaiga.

Ua taua e le Alii Pule ia Farid Mohammed, u o gatusa lenei faamoemoe ma sini atu  a le auaunaga a le Digicel o Customers, Digital ma le Simplicity.  O le auaunaga i le mamalu o le atunuu ma le faafaigofieina o mea uma.

O le App lenei ua faailoa ai le taua o le tagatagai i tagata lautele ma lo tatou atunuu, e ala i le mafai ai ona o latou faatino mea uma i o latou tamatamailima, ma o nei suiga fou tau digital o se laasaga ua ausia mo le lumanai manuia o le atunuu.

(0)