Faae’e le suafa Samoatele i le maea ai o le 40 Tausaga

0
703

O le Aso Toana’i na mavae nei lea sa faataunuuina ai le faafotu tupu ma le faafotu o le va’aali’i i le suafa Samoatele faapea nisi o matai ua sao i matau, mo suli o Samoatele Tauamaatu i le afioaga o Moata’a, le afio o Tofaeono o le matua, afifio Asi ma Patu, alalata’i i laua na ta’i Tamapua ma Manogiamanu, alalata’i le nofo a ituaiga ia te oe Fuata.

O lea aso i lona taeao segisegi, ao lei malamalama lelei na vaaia ai le taufai sagisagi fiafia mai o le aiga, ae le gata i lea o le alalafaga o Moataa, ia faapea foi malo usu mai le itumalo, e tali atu i le valaau faaaloalo mai o le paia o le aiga i le faapaleina o e ua afu le tautua e pei o upu a le atunuu ‘O le ala i le pule o le tautua’.

Na faaalia e le tofa Fuata poo le Afioga Tagaloa Taimalieutu V Palemene o se tasi e le gata sa i le komiti ma o le sooupu mo le aiga, ae o se suli mai foi i le suafa Samoatele. O lo latou aiga ua silia i le 40 tausaga talu ona tuumai le suafa Samoatele.

O le tausaga 2012 lea sa faia ai feutagaiga, ma feliuliua’i ai le tofa i le paia o le aiga, i se tulaga o le a mafai ona tasi iai, pe tasi le nofo i le suafa Samoatele pe o le a faasalafa le suafa i loomatutua e toavalu lea o loo tupuga mai ai suli ia na fai saofai i le Aso Toanai.

O le toavalu o tino ua nao le toalima ua mafai ona faia nofo, ae lei iai le isi toatolu i le suafa Samoatele. O le toalima o Toatasi Palemene, Taviu Wright, Tuvalu Lokeni, Harry Porter ma Faataga Poutasi.

E silia i le 40 i latou na faaee iai le faamanuiaga e avea ma matai i totonu o lea foi aiga aemaise o le afioaga o Moata’a.

O isi o matai e aofia ai le suafa Faleagafulu e toalima sa faamatai ai, Suafa Falefitu e toalua, Suafa Pouvalu e toatasi, Suafa Fuata e 14, toatolu le suafa Umutitau, Alailepule e toalua, suafa Taumalosi e toatasi, suafa Lagaseu e toafitu, suafa Fonomaalii e toalua, suafa Tauamaatu e to’alima, suafa Alotau e toalua ma le suafa Uateatauloa e toatasi.

Sa faailoa foi e toatele i latou o loo aumau i atunuu mamao e pei o Niu Sila, Ausetali, ma Amerika lea sa auai mai e faia o latou matai.

Sa vaaia foi i matai fou le auvaa o tamaita’i ua pale mai ma ave iai le faaeaea a o latou aiga i suafa matai i lea aso.

O nisi o i latou o loo i vaega maualuluga o matagaluega a le malo e pei o le Iunivesite Aoao o Samoa lea o loo ua pale mai ai le tamaitai faiaoga ia Edna Temese. Sa ia faafetaia ma viia ai le Alii, aemaise o lona tuaa le sa umia le suafa Lagaseu lea ua faae’eina atu nei ia te ia.

E le gata i lea o le tamaitai fomai ia Litara Esera Tulifau o le Soifua Maloloina lea ua faaee iai le suafa Fuata.

Sa faaeeina foi le suafa Fuata i le alii loia ia Tupuola Pauli Tuia o le Ofisa o le Komesina o Sulufaiga ma o ia foi o loo gafa ma suesuega i mataupu tau pulega lelei –  Principle Investigator, Good Governance.

Na taua e suli ma feoi o le suafa Samoatele lo latou fiafia, i le 40 tausaga o tuua le suafa o le aiga e le’o se taimi pu’upu’u, ua tutupu ma ola fanau, o le finagalo autasi o le mea sili lea ona faafetaia, e pei ona mafua ai ona tino mai le faamoemoe sa lupe.

Sa lagona o le umi foi ona feumia’ina le tofa o le taua foi lea o se suafa i se aiga, latou te filifili tonu ai e agavaa e tulai mo le taitaiga.

E vaaia pea le faatupulaia o le faia o matai, ma ua tele aiga ua mautu e le gata i le tautuaina o nuu, ekalesia ae o le lotoifale o aiga taitasi, ona ua matai fanau e faamoemoe iai aiga mo le atinaega.

O Samoa lava ia ua ‘au le inailau a tamaitai ma ua vaaia le saofaiga o tamaitai i suafa matai e le gata i afioaga ae o tulaga maualuluga foi o le Malo o Samoa.


Maina Vai

Maina Vai of Fasitoouta is a mother of five. Maina has recently graduated with a Certificate of Customary Adjudication from the National University of Samoa.
Maina Vai