Aso 19 Mati 2022, Apia Samoa. O loo faa’auau pea sailiiliga a le Matagaluega o Leoleo i se tino maliu sa maua i le afioaga o Malie. Sa maua atu le tino maliu o lenei alii o loo foliga mai sa pule i lona ola, ae peitai, o loo iai manuaga i lona tino.
Sa saunoa le Sui Komesina o Leoleo (Deputy Commissioner) le afioga ia Auapaau Logoitino Filipo, o le amataga o le vaiaso na lipotia atu ai i le ofisa o leoleo lenei faalavelave, e pei ona molimauina e nisi o sui o le afioaga.
O lenei faalavelave o loo faagasolo peaiai suesuega a le CID (criminal investigation division) i se mafuaaga tonu o le maliu o lē ua aafia.
Sa tāua e se tasi o sui o le afioaga ia Tauafao Ioane, e faapea o le tino maliu na maua atu i luga o se laau (koko), i totonu o se pa povi a se tasi o le afioaga. “E lē o mautinoa pe na pule lea alii i lona ola, poo ni faiga faasolitulafono ua mafua ai ona maliu..”
Sa tā’ua foi e le molimau o lenei alii, sa soifua mai lava i le afioaga o Malie, ae sau o ia mai le pitonuu o Vailoa.
O le molimau a nisi o le afioaga, o le talavou ua maliu nei, e suafa ia Spencer. O ia o se talavou e galue malosi i le fatuaiga aua le tautuaina o lona aiga. O se alii foi e masani ona vaaia i le malae lakapi a le afioaga o Malie. E agamalu ma tausaafia ona uiga.
Saunoa le Sui Komesina o Leoleo ia Auapaau Logoitino, o loo faa’auau pea suesuega i le mafuaga o lenei faalavelave, ae o le taimi nei, e le o iai se isi o loo masalomia poo tuuaia i lenei faalavelave.
(0)
