Toe tuu atu le Apili a Samuelu i le Faamasino Sinia o le Faamasinoga Maualuga

0
485

Ua faaauau pea ona nofo taofia Samuelu Fauena Sua i le vaavaaiga leoleo (custody) ae sei toe tuuina atu lana mataupu i le Faamasino Sinia o le Faamasinoga Maualuga.

O le amataga o lenei vaiaso na toe tulai ai i luma o le Faamasinoga Maualuga le susuga ia Samuelu Fauena Sua, i le valaauina o lana talosaga toe iloilo mo se avanoa e tatala ai o ia i tua, e tālia ai taualumaga o lana mataupu.

Sa teena e le Faamasinoga Faaitumalo le talosaga a Samuelu e tatala ai o ia i tua, ona e tele ni vaiaso sa sailia ai o ia, ae le’i faaoo ane i le Ofisa o Leoleo.

Sa finau le afioga ia Unasa Iuni Sapolu, mo se avanoa e tatala ai Samuelu, ina ia feiloai ma faatasia ma aiga faapea le fanau.

Peitai na teena malosi e le loia a le Ofisa o le Loia Sili (Prosecutor) iaTaimalelagi  Leinafo Strickland.

Sa taua eTaimalelagi, e iai nisi o vaega e ao ona silasila totoa iai le Faamasinoga e pei ona tāmau i faamaumauga a le itu a leoleo.

O ia vaega ua manatu ai le afioga i le Faamasino ia Fepuleai Ameperosa Roma, e ao ona toe fo’i pea le mataupu i le afioga i le Faamasino Sinia ia Vui Clearance Nelson, “o loo iai le faila ma le atoaga o lenei mataupu, o le talosaga apili mo se avanoa e tatala ai i tua.”

Ua faatulaga e le faamasinoga le Aso 5 o Aukuso, e toe fofogaina ai lenei mataupu i luma o le afioga ia Vui.

O le faaiuga o le vaiaso talu ai na tatala ai i tua le toalua o Sam ia Sivai Kepi, e faatasi atu ai i lana fanau ao tālia ai se aso e faatulaga ai e le Faamasinoga Faaitumalo le suesueina o molimau.

O le vaiaso talu ai sa talosaga ai loia a Samuelu ma isi, e toe tolopo le suesueina o le latou mataupu i le tausaga fou 2025, ona e le o avanoa loia KC mai Niu Sila.

“E faatoa avanoa ia Mati ma Aperila o le tausaga 2025.. ”

O le isi mafuaaga na tuuina atu i luma o le faamasinoga, o le moomia lea ona faaliliuina i le faaperetania tala poo faamaumauga (evidence) mo le faafaigofieina o tapenaga a loia o loo tulai mo ē ua molia.

O Samuelu ma Sivai o loo tuuaia faatasi ma le faipule o Salega, le afioga ia Fepuleai Faimata Su’a, faapea ma se leoleo satini asiasi le tofa ia Li’o Faataumalama Auava, ma Lise Marie Schmidt.

O loo molia uma i latou i tuuaiga o le faia ma le fafauina faamatalaga sēsē i le maliu ai o se tama aoga NUS i se faalavelave tau taavale hit-n-run.

E 104 moliaga o loo faasaga ia Samuelu ae 59 lona toalua ia Sivai. O le faipule ia Fepulea’i e 18, ae o le alii leoleo ia Li’o e 9, ma Lisemarie e 4 moliaga.

O le afioga iā Unasa Iuni Sapolu o loo tulai mo Samuelu Su’a ma Sivai Kepi, o Muriel Lui o loo tu mo le faipule ia Fepuleai Su’a, Lisemarie Schmidt and Tanya Toailoa representing Li’o Faataumalama Auava.