Ua faa’auau pea ona nofo taofia i latou e toasefulu sa taofia mai i se osofaiga a leoleo i le Aso 19 o Setema 2023 i Puipaa, lea sa maua ai le $23,000 tala ma oloa e silia mai le $50,000 le tau aofai.
E toasefulu alii ma le tamaitai e toatasi sa taofia mai e leoleo, ma o ananafi le Aso Lua 17 Oketopa sa tulai uma ai nei alii i luma o le Faamasinoga Maualuga.
E pei ona saunoa le Sui Komesina o Leoleo iā Papalii Monalisa Tiai-Keti, o i latou nei e aofia ai ma nisi sa molia muamua faapea nisi o loo talia a latou Faamasinoga, e pei o Faatau Uepa, lea sa maua atu i le osofaiga i Puipaa, ae o loo tatala i tua i aiaiga (probation) e tālia ai se isi foi mataupu na molia ai i le tausaga 2021.
O le Aso Gafua 02 Oketopa sa tulai ai Faatau Uepa ma tuuina mai ai e le Faamasino iā Niava Mata Tuatagaloa le faasalaga e ono masina ina ua faamaonia lona uumia o le 0.3 kalama o le aisa ma se paipa e ulaina ai.
O i latou e toasefulu e aofia ai;
* William Rankin
* Faatau Uepa
* Tesimale Mareko
* Aitken Keil
*Lagafuaina Milo
* I’amanu Laumata
* Faasavalu Su’a
* Levitiko Taliaoa Toa
* Wena Harris Chritchon
* Konelio Silipa
O Lagafuaina Milo, faapea I’amanu Laumata, o loo tulai ai le afioga ia Unasa Iuni Sapolu, ae mo Faasavalu Su’a o loo tulai ai le alii loia ia Quentin Sauaga.
Na teena e le itu a leoleo le talosaga a loia mo se avanoa e tatala ai i tua i latou e tālia ai le faasologa o taualumaga o le Faamasinoga (bail applications).
Ae o isi o loo tulai, sa tuuina atu iai le avanoa e saili ai ni a latou loia e tulai mo i latou.
Ua faatulaga e le afioga i le alii faamasino ia Fepuleai Ameperosa Roma le Aso Gafua o le vaiaso fou, e tatau ona tulai ai ni loia mo i latou, ae o se avanoa foi ua tuuina atu i le itu a leoleo e faamautu uma ai a latou moliaga.
O suesuega a leoleo i lenei osofaiga i Puipaa, sa maua ai faamatalaga ma faatino ai se isi foi osofaiga i Taifaifoe i Moataa, lea sa toesea mai ai e leoleo se tino i tupe e tusa ma le $10,000 tala ma fualaau faasaina. E toa ono ni alii sa taofia mai ai.
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
