E le’i mautu se fa’ai’uga a le Afioga Tuala Tevaga Iosefo Ponifasio ma o loo faaauau pea ana fetuunaiga ma faatalanoaga ma vaega faaupufai uma e lua.  Ua fa’alauiloa mai e ala i sana saunoaga i le Samoa Global News, e le’i maua se fa’ai’uga mo sana filifiliga e ala i se vaega fa’aupufai e ono alu iai.
“Ia manino Samoa, e le’o iai se fa’ai’uga ua iai i le taimi nei, ua na’o feiloa’iga muamua sa ‘ou feiloa’i atu ai i le ta’ita’i o le vaega fa’aupufai a le HRPP fa’apea ma le ta’ita’i a le vaega fa’aupufai a le FAST…
“O lo’o iai foi isi feiloa’iga o lo’o fa’atulagaina mo le aso ma ta’ita’i o vaega fa’aupufai ta’itasi ma tapena mae’a ai se fa’ai’uga o le a fai”.
O Tuala o le a fa’apea ona iloa tonu ai po’o ai le Vaega Fa’aupufai o le a tula’i mai e ta’ita’ia le faigamalo mo le isi lima tausaga o lumana’i ina ua mae’a le faitauga aloa’ia o le faigapalota i le vaiaso ua mavae, o lo’o tutusa nofoa a vaega fa’aupufai nei e lua a le HRPP ma le FAST i le ta’i 25. O lo’o fa’atalia nei e le mamalu o le atunu’u se faaiuga a Tuala, po’o le a sana filifiliga e ala i se pati o le a auai atu iai.
“Ou te fa’atalofa atu Samoa i lau fa’afofoga’aga i lenei itula o ou pa’ia ma ou sa Samoa o le a ‘ou le o’o iai o pa’ia e tumau e o’o i le fa’avavau, ae ia vi’ia pea Le Atua i lona alofa ia Samoa ua ia aumaia le filemu i o tatou tagata e ala mai lea i le fa’ai’uga o le faigapalota sa alo atu iai le atunu’u, ae tatau ona avatu se tala aua le nofo silafia o tagata uma, ae le’i faia se fa’ai’uga o le vala’auina o se faigamalo fou o le Malo Tuto’atasi o Samoa e fa’avae i Le Atua.
Sa talosagaina e le Afioga ia Tuala, le tapuai’ga a le mamalu o le atunu’u ae alo atu e faaauau fetuunaiga ma vaega faaupufai e lua, ma ia faapea mai, e le o toe mamao se taimi ona faailoa mai lea o lana faaiuga aloaia.
“O le tatalo a lo’u nei tagata, ia to’a pea le tai i lau tapua’iga Samoa ae se’i saga’i ane ‘ai o le tai e fa’atino ni feutaga’iga ma itu e lua o le HRPP fa’apea le FAST e saili ai se faigamalo o le a tula’i mai e fa’atino le finagalo o le Atua mo Samoa e ala mai lea i se faigamalo ua agava’a, fa’amaoni ma alofa”.
“O se taimi o i luma ua le toe mamao ona fofoga aloa’ia atu lea o le aso ma le taimi e tu’uina aloa’ia atu ai se filifiliga po’o se fa’ai’uga ua iai”.
O loo faapea mai le alii loia, o loo ia fetuunai pea mo se faaiuga e ono tulai mai ai se faigamalo e maua ai se manuia lautele o tagatanuu uma o Samoa.
“O se faigamalo o le a fa’atautaia le taitaiina o lo tatou atunuu aua lo tatou fa’amoemoe mo se manuia lautele mo tagata uma aemaise le tautuaina o le Atua na fa’avae ai Samoa.
Ia manuia lau tapua’iga Samoa.
O Tuala Tevaga Iosefo Ponifasio.
O le sui tutoatasi ia Tuala, o se alii loia sinia ma o ia foi o le Peresetene o Fitafita ua Fa’amae’a lo latou Tautua i vaega’au eseese sa tautua ai (Samoa Returned Services Association). Na amata mai lava ona tauva Tuala mo faigapalota i le tausaga e 2006 se’ia o’o mai lava i le tausaga lenei lea fa’ato’a manuia ai, ma tula’i mai ai lenei tulaga matautia. O lana filifiliga toatasi, o le a maua ai se iuga o le faigamalo a Samoa mo le isi 5 tausaga.
