I se faasalalauga faapitoa mai le pulega o le NPF na saunoa ai le afioga i le pule sili ia Pauli Prince Suhren e faapea, i le maea ai o le Aso Tofi o le vaiaso nei, ua ova atu ma le $14.2 miliona tala le tino i tupe ua mafai ona faamatu’u atu i tua, ia i latou e silia ma le 13 afe le aofai o le au fai saofaga.
Sa saunoa Pauli e faauiloa, e oo mai i le faaiuga o le aso ananafi ua 13,118 le aofai o le au fai saofaga ua mafai ona maua a latou meaalofa faapitoa lea. O se tulaga e faafiafiaina ai tele le Ofisa ona o le tali atu a le mamalu o le atunuu i le faaogaina le online portal lea ua faafaigofieina ai, ma vave le faatinoga o le galuega.
“O le tino i tupe ua mafai ona tuuina atu i tatou au fai saofaga ua silia ma le $14.2 miliona tala..
“Ia o se tulaga matagofie, ae o se tulaga lelei foi ua tatou iloa ai o lea ua mafai lava ona faatino i Upega tafailagi la tatou auaunaga lenei ma o se auala faigofie foi.”
Saunoa Pauli, o le tau aofai o le 3% lea e tufaina nei, e $25 miliona tala, ae o le taimi nei, e $14.2 miliona le tupe ua mafai ona faamatu’u atu.
“Ia, o lona uiga, toe 10 ma ona tupu miliona le tupe o loo totoe nei mo nisi o le au fai saofaga e lei talaina lava i tua, ia pe le mananao foi e tala i tua..ae o loo faagasolo atu lava seia oo atu i le Aso 27 o Me, e pei ona tuuina atu i nisi foi faasalalauga sa muamua atu.”
Saunoa Pauli o se naunautaiga ia te ia faapea le pulega, ina ia resitara uma le mamalu o le au fai saofaga i luga o upega tafailagi, aua o le ā faaauau ai pea ona faatino i luga o le online portal nisi tufaga pasene i le lumanai.
Ma e oo mai i le faaiuga o le Aso Tofi, ua silia ma le 23,158 le au fai saofaga ua resitalaina i luga o lenei online portal.
“O se tulaga matagofie tele, i le lua vaiaso ua tuanai atu, e silia ma le 10,000 le au resitala fou, lea ua maua ai le aofai lea e 23,000 ma ona tupu..”
Na saunoa foi Pauli, ua avea lenei auaunaga vave ma auala ua le toe iai fo’i ma se mafuaaga e alai ona toe oo mai ai fua se sui fai saofaga i le ofisa o le NPF pe afai e fia apalai le small loan poo le loan foi lea e tāua o le entitle.
O le lava ua mafai lava ona faaoga le auala vave lea i luga o upega tafailagi e faatino ai auauanaga uma ia a le tatou NPF.
O le pasene o too tufaina nei o se pasene faapitoa mo le Iupeli Auro a le NPF, lea la e faamea mai ia Tesema le isi 2% e faaatoa ai le 5%.
Ae faamanino mai e Pauli, e ese foi le dividend faaletausaga a le au fai saofaga, lea e fua i le tausaga faaletupe o Iuni 2021, ae tufaina ia Iulai o le 2022.
(0)
