Fa’aauau ona Fautuaina e le Matagaluega o Soifua Maloloina Matua ma Aiga ina ia Tautuana Tui Puipui o le Misela mo Alo ma Fanau Laiti

0
431

Ua tuuina mai e le Fa’atonu Sili Aoao o le Soifua Maloloina le afioga iā Aiono Dr Alec Ekeroma se faamatalaga aloaia faalauaitele aua le puipuiga o le Misela, Mami ma le Rupela (MMR).

“E fa’aauau ona fautuaina pea e le Matagaluega o le Soifua Maloloina le mamalu o le atunu’u aemaise matua faapea ma aiga ina ia tautuana e fai tui puipui o le misela mo alo ma fanau laiti i lalo ifo o le 5 tausaga le matutua e le’i faia tui puipui o le Misela, Mami ma le Rupela (MMR).”

Ua fa’ailoa nei e Niu Sila le fa’amaonia o le iai o nisi ua a’afia i le Misela i totonu o le latou atunu’u ma o lo’o fa’atinoina le galuega a le latou Ofisa o le Soifua Maloloina ina ia taofiofi le pepesi o le fa’ama’i.

Ua toe fa’aolooloma’au mai le Faatonu Sili i le paia o le atunu’u ina ia aua ne’i nofoa’i ma ia talia fautuaga uma e pei ona tu’uina mai, aua lava le puipuiga o tatou tagata aemaise alo ma fanau laiti.

“E tatau ona atoa tui puipui e lua o le Misela, Mami ma le Rupela o alo ma fanau laiti e puipuia ai i latou mai le misela i le 9 masina ma le 15 masina le matutua.”

“Afai e te le o mautinoa ua mae’a ona fa’atino tui puipui o le misela o lou alo, fa’amolemole susū ane i se falema’i fa’aitumalo po’o so’o se falema’i lata ane e fa’atino tui puipui o lou alo, pe valaau le telefoni 66693 a le Matagaluega o le Soifua Maloloina mo nisi fa’amatalaga.”

O lo’o fa’aauau pea le galuega tulituliloa a le Matagaluega e ala i le fa’atinoina o tui puipui i totonu o nu’u ma afioaga e pei ona savalia ai le tele o aiga ina ia mautinoa o lo’o fai tui puipui o alo ma fanau.

“E momoli le fa’amalo i le lagolago i le tele o nu’u ma afioaga o lo’o atoa ma mae’a tui puipui masani o alo ma fanau. Ae peita’i, e tatalo atu lava i matua o alo ma fanau aemaise lava i nisi o vaega o le talafatai o Apia faapea ma nu’u ma afioaga o le itu Matu i Sisifo o Upolu (amata atu le taulaga e aga’i atu i Mulifanua ma fa’asolo atu i Falelatai) faapea ma le itu i Saute Sasa’e o Upolu e lei fa’atinoina lava tui puipui o le Misela faapea ma tamaiti ua atoa le 15 masina le matutua, ina ia mautinoa le atoa o tui puipui o le Misela aua lava puipuiga mai lenei fa’ama’i.”

O le a le Misela?

O le Misela o se fa’ama’i e pipisi ma e faigofie ona feave’aia e le ea pe a tale ma mafatua le tagata ua a’afia. E a’afia fo’i pe afai e pa’i atu i nofoaga ma laualuga o meafaitino na tale ma mafatua ai le tagata ua a’afia.

E maualuga le avanoa e a’afia ai le tagata e le’i faia sona tui puipui o le misela aemaise pe a e latalata ma nofo fa’atasi ma le tagata ua a’afia.

Āuga ma Foliga Va’aia o le Misela

O āuga ma foliga va’aia o le Misela e aofia ai le fiva, mātūtū le tale, mūmū pe fulafula mata, tafe le isu, mafatua so’o, pata le ulu ma fa’asolo atu le tino atoa, vaivai ma gagase tino, lē manogi se fiaai. Fa’amolemole valaau le 66693 pe vave va’ai se falema’i lata ane pe afai ua alia’e nei āuga ia te oe po’o seisi o lou aiga.

O o’oo’oga po’o a’afiaga tūgā o le misela, e aofia ai le tīgā o taliga ma o’o ai ina le lagona se mea, tatā le manava, fula le faiai ma o’o ai ina a’afia i nisi o a’afiaga tumau o le soifua, nimonia ma ono o’o ai ina maliu.

E toe tatalo atu le Matagaluega i le mamalu o le atunu’u aemaise i matua, fa’amolemole e tautuanā tui puipui o le Misela o alo ma fanau laiti e mautinoa ua fai, fa’apea ma isi tui puipui fa’aauau e puipuia mai ai i isi mau fa’ama’i. E taua lava le siaki o le tusi tui po’o le pepa tui o lou alo ina ia mautinoa ua fa’atino uma tui puipui.

(685) 68100 enquiries@health.gov.ws (685) 66600 www.health.gov.ws

Mo nisi fa’amatalaga, fa’amolemole fa’afeso’ota’i le Vaega mo Tui Puipui i le telefoni 66693 po’o Auaunaga Fa’aasoifua Maloloina Lautele i le 66600.

Sainia lenei faasalalauga taua e Aiono Dr. Alec Ekeroma, Fa’atonu Sili Aoao o le Soifua Maloloina.