Ua toe faaauau molimau o le Faamasinoga a se tasi sa avea ma alii leoleo, ua molia i lona lafoina o upu taufaaleaga ina ua ia tuuaia lē sa avea ma Sui Fofoga Fetalai, i ni tuuaiga matuia faapea sa ia taumafai e faamalosi se tamaitai leoleo i le tausaga 2007.
O le taeao o le Aso Faraile na tulai ai i luma o le Faamasinoga Faaitumalo lē sa avea ma taitai o le Vaega Suesue Faapitoa (CID) a le matagaluega o leoleo, ia Papalii Efo Moalele, e molimau i lea mataupu o loo tuuaia ai Paepaetele Ernest Junior Betham.
O loo tuuaia nei Paepaetele i ni lafoga matuia ua tauleagaina ai se tasi, poo le defamation agai i le Afioga ia Nafoitoa Talaimanu Keti, o lē sa avea ma Sui Fofoga Fetalai o le Maota. O Nafoitoa sa tautua o ia i le matagaluega o leoleo mai lava ia Aperila 1980 seia oo mai ia Tesema 2015 ina ua ia faamavae e tamoe i faigapalota o le 2016. E faamavae ua ia tauaveina le tofi o le Sui Komesina o Leoleo.
O le Aso 29 o Mati 2021, ao toe 11 aso faatino le faigapalota tele o le Aso 9 Aperila, sa saunoa ai Paepaetele i luga o le TV2 e faapea, sa taumafai Nafoitoa e faamalosi se tamaitai leoleo, ao latou galulue faatasi i latou i le tausaga 2007 – i le 14 tausaga talu ai.
I le tuuina mai o le molimau a Papalii Efo Moalele, o le sa avea ma taitai o le CID i lena taimi, ae ua avea nei ma Sui Komesina o Leoleo (Assistant Police Commissioner), ua 40 nei ona tausaga, ae ua 22 tausaga o tautua i le matagaluega o leoleo.
I le aso 30 Mati 2021, sa faaulu atu ai se tagi i le Ofisa o Leoleo i Apia a lē sa avea ma Sui Fofoga Fetalai o le Maota o le Palemene, le afioga ia Nafoitoa Talaimanu Keti. O lena tagi e faatatau lea i ni faamatalaga faalumaluma e tauvalea ai lona tagata, ma ua talitonu le sa avea ma Sui Fofoga Fetalai, o ni faamatalaga sa faia ma le mautinoa ina ia faaleagaina ai lana tapenaga mo le faigapalota.
O nei faamatalaga sa logoina ma faalauiloa e le EFKS TV2, peitai, sa teena e le TV2 lenei mataupu. O lea na tuuina ai loa se search warrant i le EFKS e faamalosia ai le sueina mai o latou polokalame, mo se kopi o lea faatalatalanoaga.
Sa molimau Papalii Efo o le Aso 3 o Aperila 2021 na oo atu ai i le ofisa o leoleo le failautusi o le EFKS, le susuga ia Vavatau Taufao.
Sa tuuina atu e Vavatau se flash drive o loo iai le faatalatalanoaga o lenei mataupu, ua mafua ai le tagi.
Sa logoina lē ua tuua’ia nei, le susuga ia Paepaetele Ernest Betham.
Sa oo ifo Enesi ma ia faailoa o le a ia agai e aumai molimau peitai, e po lava lena aso e lei oo ifo molimau e pei ona ia folafolaina.
I le tuuaia ai o Paepaetele i lenei mataupu, e ao lava ia Paepaetele ona tuuina mai molimau e faamaoniaina ai ana tuuaiga ua lafo ma faalauaitele i luga o ala ata o le TV2.
I le aso 2 Aperila, sa valaau ai loa Paepaetele e oo ane i le ofisa mo sana faamatalaga, peitai, ua fiu foi e tālia e lei oo ifo lava.
Molimau Papalii, o le isi aso na sosoo ai, le Aso 3 lea o Aperila na toe valaau ai foi Enesi, ae peitai ua faapea mai, ua maea na la talanoa ma lana loia. O ia e le sau, ae a fia maua ia, ona o atu lea o leoleo e saisai mai ia.
I le faagasologa o taualumaga o le molimau a Papalii Efo, sa tuuina mai ai e le Sui Komesina o Leoleo upu sa lafoina e lē ua molia, e tusa ai ma le kopi poo le video sa maua mai i le EFKS TV2.
Ina ua toe ki atu le polokalame a le EFKS, na molimauina ai le faatalatalanoaga lea na maitauina ai ni upu na lafo e Paepaetele Ernest e faapea; o Nafoitoa Talaimanu Keti, sa taumafai lea e faamalosi se tamaitai leoleo, ae leai se moliaga poo se suesuega sa faia.
“Ia faafefea na sau e faatonutonu le Maota, ao lae saofai ma mea sese, e le faavalevale a’u tala lea e fai atu, afai foi e iai ni moliaga ia o lea ou te sauniuni atu..”
Sa fesiligia e le loia a Paepaetele, le susuga ia Quentin Sauaga le tamaitai o Papalii Efo, pe aisea na lē tapā ai se faamaoniga mai le EFKS o le video lea, ae na tali Papalii, e le manaomia se faamaoniga. O le video lava lea na ou matamata iai.
Na toe fesili foi le alii loia pe aisea na le faaali ai ia Paepaetele le video lea i le taimi o le faatalatalaoaga, ae na tali Papalii Efo e maumaututu lava lona talitonuga o le video lava lea, ma o Paepaetele foi lea sa vaaia i luga o le video i le taimi o le faatalanoa i luga o le ala ata o le EFKS TV2.
Sa fesili Quentin pe aisea ua leai ai se transcript poo se faamaumauga o faamatalaga mai le video, ma lana fesili mulimuli, pe aisea na le faia ai suesuega i le ala ata lea na latou publish pe faalauiloaina le ata.
O lenei mataupu, ua maea ona tuuina mai le molimau a le tamaitai leoleo o loo faatatau iai le tuuaiga a Paepaetele.
I lea molimau, sa tuuina mai ai e le tamaitai leoleo se faamatalaga auiliili o lea po i le tausaga 2007 ao tiute i latou i Faleolo, ae o loo taitai Nafoitoa Talaimanu. O lana molimau, e na o ni upu e ole ai o ia, ae leai lava se mea sa tupu.
O loo faa’auau pea lenei mataupu i le faamasinoga faaitumalo, i luma o le afioga i le Faamasino ia Loau Donald Kerslake.
O se aso o le vaiaso fou e valaau ai lē o loo tua’ia, mo lana molimau.
(128)
