Ua tuuina mai se faaiuga a le Matagaluega o Aoga, mo le taimi nei, auā lava le faaeteetega o aafiaga e ono tula’i mai i le fanau, ona o le faama’i o le dengue fever.
E na o fanau aoga mai le year 1 e oo atu i le vasega 7 poo le year 7 mai itumalo tū taulaga e faaauau ona malolo seia oo atu i le Aso Faraie 25 Iulai.
O itumalo o Vaimauga 1, 2, Faleata 1, 2 ma Sagaga 1, 2 faapea Aana 1, 2 e faaauau ona malōlō i aiga le fanau mai le Year 1 – Year 7.
O le tuuina atu o se tuualalo le Matagaluega o Soifua Maloloina i le Matagaluega o Aoga ma Aganuu ona o le tulaga siitia o le aofai o le atunuu ua aafia i le faama’i o le dengue fever – o se faama’i e feavea’ia e le namu.
O lea ua tuuina mai ai se finagalo le Matagaluega o Aoga e tauala mai i le Ofisa Sili le afioga Aeau Chris Hazelman.
Saunoa Aeau, “I faamaumauga a le Soifua Maloloina o loo pito aafia fanau i le va o le 4 agai i le 10 tausaga..
“O lea ua fetuuna’i ai se faaiuga, e nā o fanau amata i le vasega 1 sei oo i le vasega 7, mai itumalo o loo faamauina e le Soifua Maloloina o loo pito sili ona aafia i le faama’i o le dengue fever..”
“O le a faaauau pea latou tuuaga seia iai se isi faaaliga.”
Saunoa fo’i Aeau, o Itumalo ia o loo fa’amauina e le Matāgaluega o Soifua Maloloina, o loo mamafa iai aafiaga.
O vasega 8 e oo atu i le vasega 12 o itumalo uma, faapea fo’i ma vasega 1-7 a itumalo uma e lē o tā’ua i le faasalalauga, o le a toe a’e uma i le Aso Gafua, aso 21 lea o Iulai.”
O le faaiuga a le Ofisa Sili o aoga o loo faavae lea i luga o suega a le vasega 8 ma le vasega 10 ma le 12 e pei ona faatulagaina mo le masina o Oketopa ma Novema o le tausaga nei.
E manatu le Ofisa Sili o le a aafia le faatulagana o le silapasi a fanau aoga pe afai o le a faatino se tuuaga – ae ua vaai le Matagaluega i nofoaga o loo faamauina le aafia i le faama’i o le dengue fever.
Saunoa Aeau, “O le faaiuga lea mo le taimi nei – ae o le a iai se isi fetuunaiga, pe afai e iai nisi suiga i faamaumauga mai le Matagaluega o Soifua Maloloina..”
Ua tuuina mai foi se tuualalo a le Ofisa Sili mo laumua uma – i ulu aoga ma le aiga faiaoga – ina ia faatino se galuega faamāmā i lotoā mo le tausiaina ma le malu puipuia o le Soifua o fanau.
E 237 le aofai o ē ua aafia i le dengue fever, i faamaumauga lata mai o le Matagaluega o le Soifua Maloloina.
Ua faamauina foi le mafuli o lea fuainumera i fanau mai le 4 tausaga agai i le 10 tausaga.
Clearance Sale
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
