Faaaoga e le Malo Tausi le Pule Tutasi a le Ao o le Malo mo le Faaaluina o Tupe

0
280

O le saunoaga lenei ua tuuina mai e le Palemia Tausi o Samoa ina ua lata le Aso 30 Iuni 2021, e maea ai le tausaga faaletupe, ae ua le mafai ona pasia le tala o le tupe mo le 2021/2022 ona e lei tauaofia le Palemene XVII o Samoa.

O lea ua tuuina mai ai e le Malo Tausi, o le a faaogaina le Vaega 93 o le Faavae o Samoa, lea e faapea ai: o le Ao Mamalu o le Malo o loo iai le pule tutasi mo le faatagaina o le faaaluina o tupe a le Malo i lalo o Teugatupe a le tatou Malo e tusa ma le Fuaiupu 93 o le Faavae o le Malo o Samoa.

Saunoaga a Tuilaepa Sailele Malielegaoi, 29 Iuni 2021.

Ou te mu’ai taia le Tu Tafaitoa ma ou tapūi le tapu a aloalii auā paia o Samoa i ona tulaga fa’alupelupe – Paia fa’ale Malō – I le Afio o le Ao Mamalu o le Malo, lau Afioga Tuiaana –
Tuimalealiifano Va’aletoa Sualauvi II,
– Afio i lau Afioga i le Sui o le Fono Sui Tofia – Le Mamea Ropati Mualia,
– Afifio o Minisita o le Kapeneta, le Fa’amasino Sili ma Fa’amasino o le Fa’amasinoga,
– Le Fofoga Fetalai ma Sui Usufono o le Fono Aoao Faitulafono.
O paia fa’asino i Aiga ma latou Tama, Tumua ma Pule, Ituau ma Alātaua, Aiga i le Tai ma le Vaa o Fonoti.

Ou te fa’atalofa atu foi i le tapuaiga mamalu a le Malo o Tutuila ma Manua o lo’o lagolagosua i le anoano o auala eseese tu’usa’o mai ai fesoasoani i le Malo o Samoa ae faapea foi nai o tatou aiga. Afio le Kovana ma lana Kapeneta, le Faamasino Sili, le afio o le Peresetene o le Senate, le Fofoga Fetalai o le Maota fa’apea Sui Usufono o maota e lua faitulafono o Amerika Samoa. O paia lava e fa’asino ia Sua ma le Vaifanua, Fofo ma Itulagi, Ituau ma Alataua, Sa’ole ma le Launiu na saelua – fa’atui o le motu, to’oto’o o le faleula ma upu i le Manua tele. Ae ma’tua lava le tu’u i le aufaigaluega paia a le Atua ma le latou fa’anōnōga manū. O paia atoa na o Samoa na lua – Tulouna outou sā ma faigā e tumau e fa’avavau. O paia lava ua popo ma pa e lē toe soloia. Fa’afetai i le tapuaiga aemaise le mana o talosaga o lo’o toafilemu ai pea si o tatou atunuu – ua masani i upufai o malo ma le fe-fa’aaliga saoloto o taofi ma manatu faitau eseese o lo’o tamau ma puipuia i totonu o le tatou Tulafono Faavae o le Malo Tutoatasi o Samoa a’o tau tu’ufaatasia se malo ua asoā o tau saili se fofo. O aga ia o malo fa’atemokalasi na filifili e ō tatou tuaā ua fai i lagi le folauga e fa’atonu folau ai lo tatou Malō – ua toe o se aga atoa le 60 tausaga le ma’tua o le Malō o Samoa e pito i ma’tua i Malō uma o le lalolagi sa nofo va’ava’aia faa Teritori a le Malo Aufa’atasi i lona fa’atoa fa’atuina i le 1945 e puipuia ai le nonofo filemu o le lalolagi ua matuā masofa i taua tetele e lua na a’afia ai le lalolagi atoa. O le mafuaaga lena e agai mai ai pea le silasila taulai a Malo Aufa’atasi ia Samoa ma solo’ai mai ai pea nai fesoasoani e lagolago i le tatou vaivai. E afua ai ona fai ma tausi pea lo tatou va lelei ma a tatou paaga uma lava o lo’o latou fa’amasino mai i aso uma e lē aunoa e ala i latou sui taualoa o lo’o i Samoa nei e lipoti i o latou laumua tatou aga o lo’o fai i aso uma e āo ai ona tatou seu le manu ma taga’i i le galu. O si ota lima foi e toe pa’ia ai lava si ota mata. E le’o le soona naunau tele foi i le i’a mo le na’o le aso e tasi ae masaesae ai le upega e fagota mo aso uma.

Ua ou manatu ai e fa’asilasila aloaia i le mamalu o le tatou atunuu i lenei itula mo le silafia. O le Aso Lulu 30 Iuni 2021, o a taeao lea, o le aso fa’aiu lea o le tausaga fa’aletupe o le tatou Malō o loo faagasolo nei, ona la’asia loa lea o le tausaga fa’aletupe fou i le Aso Tofi 1 Iulai 2021. E ao ai ona iai se Tala Fa’atatau Autu o le Tupe ua pasia e le Palemene o Samoa i lana fono usu i le Maota Fono i Tiafau, o le Malae o le Fa’autugātagi ma le Sailiga Malo a Aiga ma le usoga a Tumua ma Puleono i Salafai. Ma o le afuaga lea e tauaofia ai i le masina o Iuni i tausaga taitasi le Fono Aoao Faitulafono a Samoa i lona mamalu ua atoatoa. O sui usufono mamalu mai itumalo uma o Samoa, o sui na filifilia i le faigapalota lautele a le atunuu, na filifilia e tupu ma e’e o Samoa faatasi ai ma latou uma i luga atu o le 21 tausaga le soifua. O le itu mautinoa ua iai nei Samoa ua leai se Tala Autu o le Tupe mo le tausaga fou fa’aletupe. Ona e leai se Palemene e mafai ona tauaofia e pasia. E leai foi se Malo fou o le Paeaiga fou e mafai ona tofia. O le i’uga o mea fa’apenei o le tapuni loa o le Malo, e pei foi ona tupu so’o i le Malo tele o Amerika. Ona tapunia loa lea o Matagaluega uma a le Malō ma latou atinae o lo’o fai e aofia ai falemai, a’oga ma konekarate uma o lo’o ola ai le anoano o aiga ma fanau pele. Ae a tulai mai tulaga ogaoga nei i taimi o le taumafai foi e taofi le ulufale mai o le fa’amai oti o lo’o mafatia ai le lalolagi atoa i le taimi nei, o le ala lea o le matou taumafai ma taumafai pea e saili fōfō fa’ale-aganuu ma le fa’ale-kerisiano e masani ai matai o le atunuu ma le aufaigaluega paia a le Atua o lo’o tatou laulauvivilu ai e faigofie ai faigata uma o le olaga. Sa fa’ama’alo i’uofe atu foi ma le aafiaga o Samoa i nisi o matou faatalanoaga pe ā leai se tala o le tupe e fa’agaoioi ai le Malō peitai ua leai leai lava se fa’atāua.
Taumafai atu foi le Ao Mamalu o le Malo e toe foi i le atunuu e faia se i’uga mautu o le Faigapalota na tutusa, ae molia foi i le Fa’amasinoga i le teena o le nofo o le tamaitai faipule mai Salafai. Ua malama i ulugalu le afuaga o le gasegase o le tatou Malo. Ua nofo fale foi ia Sā Tuiāma’a mafatiaga ogaoga mai le fa’amai oti o le Koviti i le aafia ai o galuega a le toatele o tatou tagata ina ua fa’aletonu le tele o pisinisi i le taofia o faigamalaga. E aofia ai faletalimalo, faleaiga, pisinisi tau femalagaiga ma isi mau pisinisi e feso’otai ma femalagaiga mai o tagata fai pisinisi ma ola ai foi tatou pisinisi eseese, ua afaina uma ai lava ae tainane le puipuiga lautele o tatou tagata mai faamai pipisi, o le ala lea o le to’omaga loa o le tatou Malō i fofo ua lē ma’alofia e pei ona fa’ataoto mai e le tatou Tulafono Faavae o le Malo o Samoa, faapea tulafono o le faasoasoaina o tupe maua a lo tatou Malo. O le faia lea o ni poloaiga mo ni gaioiga vavave mo le taofia o ni mala tutupu e aafia ai o tatou tagata. Ma ‘aua ai nei fa’alavelaveina galuega ma fa’aiuga e tatau ma onomea mo ni fesoasoani tāua ma le ogaoga. O le fa’apogai lea o poloaiga o fa’alavelave matuiā ma mala so’oso’otauau o le Koviti 19 [State of Emergency Proclamations] o lo’o fa’aauau pea mo le puipuiga o Samoa mai le faamai oti o le Koviti 19 o lo’o fai nei.

I le leai ai o se Tala Autu o le Tupe mo le Tausaga Fou Fa’aletupe a le Malo 2021-2022, o lea ua fa’apea ai foi ona fa’agasolo ma faaauau auaunaga uma a le Malo ina ia taofia ai ni mafatiaga ogaoga tutupu e aafia uma ai le atunuu atoa i aiga uma lava, faapea atinae ma pisinisi eseese o lo’o fa’alagolago mai i auaunaga masani a le tatou Malo ae fa’aaoga ai tatou poloaiga o le SOE o iai nei, o le a fa’aauau seia oo ina pasia ese Palemene ua tauaofia le tala autu fou o le tupe mo le 2021-2022 ina ua fa’amalieina aiaiga uma o le Faavae o le Malo o Samoa i le finagalo tutasi lea o le Ao Mamalu o le Malo o Samoa.

O le a fa’apena foi ona fa’alaolao taimi galue o le aufaigaluega atoa a le Ofisa Suetusi Sili a le Malo e siaki auiliili fa’amatalaga uma tau tupe fa’aalu mo le tauaaoina mo le fa’atagana fa’apitoa a le Ao Mamalu o le Malo e tusa ai ma aiaiga o Tulafono mo le puipuiga malu o Tupe faaalu a le Malo i taimi ia o poloaiga mo fa’alavelave fa’afuasei ma mala matuiā. O le Ao Mamalu o le Malo o loo iai le pule tutasi mo le faatagaina o le faaaluina o tupe a le Malo i lalo o Teugatupe a le tatou Malo e tusa ma le Fuaiupu 93 o le Faavae o le Malo o Samoa. O le fa’aolooloma’au, ia lava pea le onosai, le toafilemu ma le fa’apalepale ao alofaiva lo tatou Malo e tau fofo alamea le mau luitau o feagai ma lo tatou atunuu. Ia fa’aifo mai lagi manū mo Samoa nei ma Eluā.

Soifua.