Lagolagoina e Mātua le Faamamafa a le Matagaluega o Aoga e Taofi Saoga Meaai i le Fanau

"Sa fai mai ai foi faiaoga e fai atu ni meaalofa a tamaiti mo latou, ae o lea foi ua sasao mai meaai, ae o meaai foi e ave e faiaoga i latou aiga".

0
2297

Ua faatoa mavae atu le aso Sa paepae i Samoa, sa faailoa ai le titi faitama o matua i fanau, e ala i le tapenaga o le lotu tamaiti ae peitai, o lea ua toe saili foi matua se seleni ina ua tuuina mai e nisi o pule aoga o aoga tulagalua (primary school) ni sāoga taumafa mo faiga suega o loo faagasolo nei e le Matagaluega o Aoga.

O le aso Tofi le Aso 14 Oketopa 2021 na tuuina mai ai se pepa o faamatalaga mai le Matagaluega o Aoga, Taaloga ma Aganuu, o loo fautuaina ai puleaoga o kolisi ma aoga tulaga lua e faapea;

“E tusa ai ma faiga faavae ma taiala a le Matagluega e lē faatagaina ona sasao o meaai i tamaiti aoga mo faiga suega”.

Peitai sa māua o loo iai lava aoga a nuu ma alalafaga o loo tuuina atu pea sāoga mo le fanau, e aumai i le vaiaso fou.

Faasologa o suesuega a le fanau.

Sa maua le avanoa e fesiligia ai le mamalu o le atunuu i so latou finagalo e faatatau i lea mataupu.

O le Susuga ia Laulua Fa’i Fagafau mai le afioaga o Malie e 51 ona tausaga e toalima si ana fanau o loo aooga i le taimi nei.

Laulua Fa’i Fagafau Mai le afioaga Malie

“Ou te matua lagolagoina le manatu o le Ofisa o Aoga; ua taugata le soifuaga ua leai foi ni tupe, ua uma i le lotu tamaiti tupe, o fea foi o le ā toe saili iai? ae faafetai mo le faamamaavega mai le ofisa o aoga”.

 

O le susuga ia Vitale Peterson, 60 tausaga mai Lalovaea sa ia teena se faiga faavae e tuu atu ai ni sāoga i le fanau.

“Ou te matua tetee a’u i nei mea o le fai o fafaga i fai suega. O a’u ou te nofo i Ausetalia ae toafa le fanau a lo’u uso o loo matou nonofo faatasi. O lea ua tuuina mai saoga meaai a tamaiti uma nei.. e vaai ma le alofa, o lona uiga o le a toe foi matua e fai loan e sue ai tupe e fai ai nei saoga ua sasao mai”.

“O le falai ia lea e tuu mai mo nisi o le fanau”.

O Mile Ah Chong 51 tausaga mai le afioaga o Leauvaa, e toatolu lana fanau aoga, ma o loo iai foi a latou saoga mo le vaiaso fou. Sa ia saunoa, afai e sao uma tamaiti i mea o loo tuuina mai, o lona uiga, e matua telē le taumafataga saunia.

“Ou te matua lagolagoina le faamamafa a le Ofisa o Aoga, aea pe’a fa’amama mai le avega, afai e toalima fanau e fafaga i le taeao, lona uiga o le tele o meaai mo faiaoga fai suega, faapea foi ma faiaoga, e ave i o latou aiga.”

O le susuga ia Tiauli Liko Tia, 60 tausaga mai Magiagi sa saunoa e lei mamao atu foi le Aso Faapitoa mo Faiaoga (Teachers Day) sa tapena ai foi meaalofa.

“Sa fai mai ai foi faiaoga e fai atu ni meaalofa a tamaiti mo latou, ae o lea foi ua sasao mai meaai, ae o meaai foi e ave e faiaoga i latou aiga”.

O le tusitala foi e toalua le fanau aoga i le aoga tulaga lua i Tuanai, ma ua tuuina mai foi le saoga a le fanau auā le faamoemoe mo le vaiaso fou. O fuamoa saka sei tulou, ma le siaumegi (chow mein).