O saunoaga a le Ofisa Sili o Pulega o le Kamupani Vaa a Samoa le Afioga ia Leiataualetaua Samuel Phineas na ia faailoa ai e lē laiiiti le numera o tagata palota o loo vaavaai iai le kamupani vaa, o le a latou faaogaina le auaunaga mo aso nei e lua, ao alo atu Samoa mo lana faiga filifiliga.
“E tusa lava ma le 3,800 le aofai o tagata palota sa tu’uina mai e le Ofisa o Faigapalota e ono malaga i Savaii, peitai, matou te manatu e sili mamao ma lea numera i latou o le a malaga.”
Sa mafai ona faatalanoa nisi o tagata palota malaga atu i le motu tele i Salafai, e aofia ai le tamā ia Semau ma lona aiga o loo nonofo nei i Fagalii-uta. O loo agai atu mo le faamoemoe i Saleaula, Savaii e faatino ai a latou palota.
Sa faailoa mai e lenei tama e faapea e le fetaui le suiga ua faia e le Malo.
“O i tonu lea ua iloa tino ai ma vaaia le faigata o le suiga lenei;
“Ia sei vaai i le laulaututu, feomiai o tagata matutua ma tamaiti”.
O le tofa ia Semau o loo malaga atu i Savaii ma lona aiga e aofia ai ona tuafāfine ma ona uso, faapea ma a latou fanau. O i latou uma nei, e faatino a la latou palota i Savaii.
“E le mafai ona malaga nā o tagata palota e pei o matua, ae tu’u a latou fanau aemaise o tamaiti laiti..
Sa faailoa foi e le tama le tulaga o le taugata o lenei fuafuaga aemaise i auala o femalagaiga.
“Sa tatau lava ona o fua le atunuu i va’a,” o le saunoaga lea a Semau.
Sa faapea mai Semau, e toatolu tagata faigaluega o lo latou aiga, ae palota uma i latou i Savaii.
“Ua tele tupe faaalu e le faigofie, aemaise ai o lea e o ma toe omai…o tupe a mea uma.. e mo’i lava fo’i o lea e faaoga va’a a le malo ae lē o ave fua tagata palota .
“E lē o fetaui nei ituaiga mea faapea.”
E ese la se finagalo i le afioga ia Tua’ilemafua Ta’a’au Matalena Godinet lea sa ia fa’aalia lona fiafia tele e agai atu i lona nu’u o Lefagaoalii e fa’atino lana palota mo lona itumalo e pele ia te ia, o Gagaifomauaga 2.
Sa ia faaalia na o ia le tagata o lo latou aiga o loo alu i Savaii. O lona toalua o lo’o palota i Faleasiu ae o lana fanau o lo’o palota i Aleisa.
“O lo’u mitamitaga o lo’u nuu, o le ala lea ou te alu ai ou te palota e lagolago la latou faiga filifiliga po’o le a lava le tulaga e o’o iai e taua le tutu faatasi..”
“Afai lava ua faae’e mai le suafa e lo’u nu’u ia te a’u, e tatau ona ou faamaoni ma ou alu e fai lo’u tiute i le mea ua valaauli’a ai a’u e Le Atua ou te galue ai..”
Sa ia fa’ailoa e lē o se tulaga faigofie le malaga atu i Savaii, ma na te silafia lelei lava le faigata mo lo tatou atunuu, ae le gata i lea o ia lea ua tu’ua lona aiga e palota i Upolu, ae agai nā o ia i Savaii.
Saunoa lenei tinā e pito sili ona fiafia o ia, ona o le a toe vaai atu i tagata o lona aiga, o lea o lo’o fa’atalitali mai uma i lona o’o atu.
Ua fa’ailoa e Tua’ilemafua lona loto fa’afetai ma le fiafia i le fuafuaga a le Malo ma le Ofisa o Faigapalota e agai tagata i o latou nu’u e palota ai.
“Aisea o le a palota mai ai fua i isi afioaga, ae o lea e tu’u mai lou nu’u sa e fanau ai ma soifua a’e ai ma o lo’o e matai ai fo’i?”
Na ia faapea mai, e leai se tāua o le ūmia o se suafa matai mai i le nu’u, ae musu e fo’i e fai le tiute, ma palota mai ai mo lou itumalo.
“O Samoa o se atunuu faamanuiaina ma o lo’o faamalumalu mai le alofa o Le Atua ia i tatou uma..” Tua’ilemafua Ta’a’au Matalena Godinet.
