E $70,000.00 le aofa’i o se fesoasoani tau tupe ua foa’i atu e le Asosi O Tina ua ta’ua o le TAUTUA PUAPUAGA O TAGATA mai le EKALESIA FAAPOTOPOTOGA KERISIANO SAMOA (EFKS) mo le Matagaluega o le Soifua Maloloina.
O lenei fesoasoani mai tinā o le EFKS ua vaevaeina, ma ua fa’amatu’u atu ai le $50,000.00 mo le falema’i fa’amama toto (NKF), ae $20,000.00 mo falema’i tutotonu i Moto’otua faapea Tuasivi i Savai’i.
E le o se taimi muamua lenei ua fesoasoani mai ai le Ekalesia EFKS i le Matagaluega o Soifua Maloloina. ma ana pa’aga.
O tausaga taitasi uma i le usu ai o le fonotele i Malua, e tuuina mai ai lava le fesoasoani tau tupe a le mafutaga a tinā, auā lava le faaleleia o le auaunaga ofoina atu mo le mamalu o le atunuu.
Ua silia ma le 10 tausaga o tuuina atu pea lenei fesoasoani e le lalo mai o le $70,000 tala.
Sa faafetaia e le afioga i le Sui Fa’atonusili o le Matagaluega o Soifua Maloloina, Auliaimalae Tagaloa Dr Robert Thomsen le Asosi ma le Ekalesia ona o lenei foa’i taua.
