E Toalua Tamaitai na Alo i le Auvaa a le Don Bosco

0
62

E toalua ni tamaitai na maua o la avanoa e alo ai i le auvaa a le aoga o matātā eseese, le Don Bosco

O Faasoo Seiuli, 21 tausaga mai Tiavea, ma Josephine Toosavili, 19 tausaga mai Amaile i Aleipata.

O i laua nei na sao atu ma maua o la avanoa ina ua fai le filiga mulimuli o le auvaa a Don Bosco lea sa tu lua i le tauvaga o le Tutoatasi i le taeao o le Aso Faraile.

Ina ua faatalanoa i laua na taua ai e lei faigofie le auala na saili mai ai so la avanoa.

E toafa latou o tamaitai na tausinio mai toleniga i le amataga, peitai, na pa’u le tasi tamaitai ona totoe mai lea o latou e toatolu ae o le taeao nei na fili ai lo latou auvaa ae faamanuiaina ai loa laua ae tapuai lē tasi o tamaitai.

Na tā’ua e Faasoo, i le taimi o tau faatulaga le tu’uga, na lagona le popole ma le fefe ina ua vaai atu i autafa, e fai lava sina matutua o isi auvaa, ae na lagona le to’a i le vaai atu i foliga ma le faamalosiau mai o Vaimasenuu.

O le molimau a le fanau teine sa mafai ona tauva i le faagatama i le tai, “o Vaimasenuu o se taitai matou te vāai maualuga iai.. e tele ana metotia e faamalosi au mai ai ia i matou, ae maise o avanoa tutusa mo matou tamaitai..”

Na laua momoli le faafetai i le tapuaiga a matua, aiga ma uo, nuu ma le laumua mo le tapuaiga, ua a’e ai ma le manuia le faamoemoe.

O Faasoo Seiuli mai Tiavea ua tolu tausaga o aoga i le laumua, o loo ia tauaveina le polokalame o le fai taavale (motor mechanic) ae o Josephine Toosavili, o lona tausaga lona lua lea i le polokalame o le faasu’isu’i.

O le auvaa a le Tolotolo o Tamauli mai Salelologa na manumalo i le tuuga fautasi ma o ai ma le malo e $60,000 afe tala.

Sa aasa le tuuga i le va o Don Bosco ma le Telefoni o le Va-i-nuu mai Manono. Ae na toe faamalolosi atu lava le auvaa a Vaimasenuu i le faaiuga, ma ausia ai le tulaga lua o le tu’uga va e faailoga ai le 60 tausaga o le tutoatasi o Samoa.