E Tāua le Pitolaau a Tusitala pe a Faasalalau Sauaga i Totonu o Aiga

"E tatau ai ona matua faatauaina e le tusitala lana pito laau, e ala lea i le lipotiina o mataupu o loo aafia ai aiga, ia aua nei manatu mama le tusitala i le tala o loo ia faasoaina atu.."

0
154

E taua tele le pitolaau a le vasega o tusitala pe a oo i taimi e faasalalau ai mataupu tau sauaga i totonu o aiga.

O le itu lea sa faamamafa i le saunoaga a le Faamasino o le Faamasinoga Faaitumalo le afioga ia Talasa Atoa-Saaga ina ia maea se mafutaga faaleaoaoga sa faatinoina mo tusitala o Samoa.

I le taualuga ai o aoaoga, na maua ai le avanoa e auai ai le Faamasino Sinia o le Faamasinoga Maualuga le afioga iā Vui Clarance Nelson faapea le Faamasino Sinia o le Faamasinoga Faaitumalo le afioga iā Talasa Atoa-Saaga.

Saunoa Senior Judge Talasa Atoa-Saaga, o mataupu o loo tuuina atu i le faamasinoga, o loo tulai mai i totonu o aiga.

“E tatau ai ona matua faatauaina e le tusitala lana pito laau, e ala lea i le lipotiina o mataupu o loo aafia ai aiga, ia aua nei manatu mama le tusitala i le tala o loo ia faasoaina atu..”

Saunoa Talasa, e tatau ona manatu mamafa i le tāua o le gagana o loo ia fa’aaogaina, o le gagana e maua ai pea le ola, ae ia mamao ese ma gagana poo faaupuga e toe aafia ai (re-victimisation).

“A ma’ea atu le faamasinoga ae e lē o iai se lagona faavaivai i lē o loo aafia, ae o loo momoli atu e le tusitala se feau e faamalosi ai i lē ua aafia ma latou iloa ai, o loo iai le avanoa ma le isi sitepu mo le agai luma..”

E fa aso na faagasolo ai lenei aoaoga ua faaigoaina o le Media Training for Reporting Domestic Violence.

O lenei aoaoga sa tuufaatasia e le UNESCO, e toe faamanatu ai taiala ma auala e limataitaia ai le galuega a le vasega o le au faasalalau.