E Tatau ona fai se Komiti Suesue o le Misela

0
623

Samoa Parliament.  O loo tumau pea le finau a le sui o Salega i Sasa’e ia Olo Fiti Vaai, e tatau ona faia se komisi suesue i le mataupu ua toatele ai e maliliu i le misela.

“Ua tatou nonofo ai ma le le mautonu ma tuufesili poo le a ea le sa’o o le mea lenei. E faatoa maua a mālama pe a mavae le pogisa, e maua aoaoga lelei ini faaletonu e tulai mai. Afai o le tatou malo na lape toe silasila pe aiseā…afai o le atunuu na lape tatou silasila pe aisea. E faigofie ona tatou galulue faatasi pe a femalamalamaa’i tagata.”

O le finagalo o Olo sa tuuina atu lea ina ua talanoaina le tala faatatau faaopoopo o le tupe. Sa maua ai avanoa o sui faipule e faaleo ai nisi o tulaga o loo manaomia ai le fesoasoani a le malo mo latou itumalo.

O loo finauina e Olo le nofo sauni ma tapena o le malo mo faamai pipisi faapei o le misela, ma ia aumaia ai nisi atunuu o le Pasefika.

“E leai se manatu matou te tusi lima poo fea o iai le sese, ae ao ona velo aso faatasi, ma galulue malosi e faamalosia faiga faavae e faatino i le faamaoni ina ia iai ni fuafuaga mamao mo faamai”

O le manatu o le sui faipule o Salega i Sasa’e na ala ona nonofo lē mautonu ma masalosalo lo tatou malo ona e leai se Global Epidemic Plan poo se Pandemic Emergency Response Plan e taiala ai le galuega lavea’i mo le atunuu.

“Ou te ta’u atu i le maota e leai se soifua e maimaua pe ana mautu ma iai se Pandemic Emergency Response Plan, e leai foi se tatou State of Emergency e faia..ua oia ai le tamaoaiga o le atunuu”

O le popolega ia Olo ona o lea ua amata pepesi mai le faama’i lea i Saina ae pe o sauni ma iai ni fuafuaga alu mamao a lo tatou malõ, ma ia aumaia ai se faataitaiga i atunuu e iai Amerika lea e faapea ua tolu malaevaalele ua taofia ae screen uma tagata malaga mai Saina.

Sa faailoa e le Alii Palemia “E leai se mea o le a popole ai o lea ua maea na ou talanoa atu ai i le polokalame o le Taimi ma le Palemia ma e mulimuli e iloa, ae ua leva lava ona oo iai talanoaga ma fuafuaga a le minisita ma matou nei”

Saunoa Olo, pe vaivai lava ma faatauvaa ae aumai lava se lagona e faufau ai lo tatou malo…”E maua lava penina i tifa e atia”


Maina Vai