E ui i le tele o taumafaiga i tulaga e faaleleia ai le siosiomaga ma foia ai mafatiaga o suiga ogaoga o le tau, o loo vaaia pea le tele o otaota lafoai ma uga o loo faaoga pea e nisi i lo tatou atunuu.
O le auai atu o se tasi o alo o le atunuu i le taumafaiga e tetee atu i suiga o le tau ma le toe faafoi o le siosiomaga i lona tulaga lelei, ua tutu faatasi ai ma le Toomaga mo e Puapuagatia (Samoa Victim Support Group) i le toe faaogaina o lapisi lafoai, e fausia ai nisi o meafaitino o loo manaomia i lo tatou olaga o aso faiso’o.
O Marion Tavai Fruean o se tamaita’i mai le kolisi o le Robert Louis Stevenson, na ia faaleo i le au faasalalau ma le au tusitala le galuega o loo o latou faia nei i lalo o le faamalu o le Samoa Youth and Climate Resilience Action Group.
O la latou taumafaiga, ina ia faailoa ma aoaoaina tagatanuu uma ina ia tausia lelei le siosiomaga. O le talitonuga a lo latou foi tupulaga, e iai lo latou sao taua i le puipuia o le siosiomaga.
O Marion Fruean o ia foi o se tasi o tupululaga talavou i le vaega o Tupulaga Talavou o le Toomaga mo e Puapuagatia (SVSG Youth) lea e tusa male 2000 tupulaga o le atunuu o loo auai ai.
O la latou galuega, e iai le faia o polokalame e faamama ai taligalu i nuu ma alalafaga. Latou te fesoasoani foi i nisi o aiga o loo vaaia ai tulaga le lelei ma saogalemu o le siosiomaga.
A’o faia ai la ia galuega e maeu foi le mafaufau sogasogā o lea alo o le atunuu e toe fausia oloa mo le faaogaina mai lapisi (recycling)
“There is recycling, reusing and upcycling;
“Recycling is when you clear not only the rubbish but you also clear the land fill so there is more space for decomposable rubbish and waste to go to.”
O lenei galuega na taua e Marion sa amata mai lava i le lotoifale o lona aiga.
“I’ve adopted a recycle program within my family, which is to recycle old metal cans, and we have been doing this for about seven months now;
“My family and I have recycled more than 50 kilos of metal right since we started, from cans of tinned fish, tuna, spaghetti..”
Na ia taua foi mai le 7 masina ua mafai ona ia fausia mai apa nei ma toe teuteuina faamatagofie e aoga mo le teuina o penitala ma isi meafaitino.
Sa taua foi e lea alo o le atunuu, e faigofie lava le galuega, ma e leai se tupe tele e moomia e toe faaleleia ai.
O loo fesoasoani atu le Toomaga mo e Puapuagatia e faatupe nisi o galuega.
Sa faaalia foi e Siliniu Lina Chang o le faatonu o le Toomaga mo e Puapuagatia, “E tele naua a matou oloa ua maua mai le lapisi lea o loo faapea tatou e tatau ona lafoai, ma o loo taumafai le Toomaga e faaoga mai aitia mai alo ma fanau nei latou te amataina ai le fausiaina o oloa nei ona faasoa atu lea i nuu ma afioaga i tua le tomai.”
O loo fuafua fo’i le Toomaga e faaoga iai la latou polokalame o le Nofotane ina ia aoaoaina ai tina ma fanau.
“O se taimi lelei lea e mafai ai ona tatou aoao atu i tina ma tupulaga talavou i totonu o nuu ma alalafaga metotia nei e faasaoina mai ai le siosiomaga.”
(1)
