Tasi le Vaiaso Tuuina atu ia King Faipopo e Su’e ai Sana Loia

May 23, 2023

E na o le tasi le vaiaso lea ua tuuina mai e le Faamasinoga Maualuga mo Malele Paulo poo King Faipopo e faamautu ai sana loia e tusa ai ma sana talosaga e moomia se taimi e toe su’e ai sana loia fou.

O le masina o Mati sa tuuina mai ai le faaiuga a le Faamasinoga mo Lema’i Simanu “Manu” Sione ma Malele Paulo “King Faipopo” e faamaonia ai moliaga o le taupulepule e faaoo le oti i lē sā avea ma Palemia o Samoa, Tuilaepa Sailele Malielegaoi, faapea lē sā avea ma Komesina o le Matagaluega o Leoleo, Fuiavailiili Su’a Egon Keil.”

Ina ua toe valaau lenei mataupu i luma o le Faamasinoga mo le tuuina mai o le faasalaga (sentencing), na faateia ai le alii loia sa tula’i mo Malele Paulo, ina ua saunoa mai King Faipopo, o ia ua manao e sui lana loia.

Sa talosaga Malele Paulo, e moomia se tolu masina, ona o loo faatalanoa sana loia mai atunuu i fafo.

Tā’ua foi e King Faipopo, o loo tau saili se auala e totogi ai sana loia, ona o ia e le o se tagata taualoa.

Saunoa foi Malele Paulo, o loo ia talosagaina le fesoasoani a le Malo (legal aid) faapea foi se upega tafailagi o le Go Fund Me e fesoasoani ai ia te ia.

Sa tali manino le alii faamasino ia Fepuleai Ameperosa Roma, e le mafai ona totogia e le fesoasoani a le Malo (legal aid) se loia mai fafo atu o Samoa.

“O le a tuuina atu le vaiaso e tasi e te aga’i ai e saili sau loia legal aid, se loia i totonu o Samoa nei, ona toe valaau lea o lau mataupu i le Aso 29 o le vaiaso fou..”

“Ia oo atu iai ua maua sau loia.”

E lua lelei vaiaso sa faagasolo ai le iloiloina o lenei mataupu, ma e silia ma le to’a sefulu molimau a le itu a leoleo na folasia i luma o lana afioga i le Faamasino Sinia, Justice Vui Clearance Nelson, faapea le Vasega o Faatonu.

Ina ua maea iloiloga na tulai ai le sui o le Vasega o Faatonu sa latou iloiloina molimau o lenei mataupu, e tuuina mai le latou faaiuga..

“E tusa ai ma le tulafono autu (Crimes Act 106 (6)) o le 2013, lea ua solia e i la’ua nei – o le taupulepule lea e faaoo le oti se isi.”

E toe toatasi sē o loo molia i lenei mataupu, peitai, e lei mafai ona tulai e tali i ona moliaga ona o loo aumau o ia i Ausetalia. O Talalelei Pauga o loo tuuaia i lona lafoina mai o tupe e totogi ai lē sa faatonuina e le au taupulepule e na te faatinoina le gaioiga, o Taualai Leiloa.

O le vaiaso fou lea e faamoemoe e tatau ai ona tuuina mai e le Faamasinoga Maualuga le faasalaga mo Malele Paulo ma Lema’i Sione.