15 Ianuari 2021, Apia Samoa. Tusia: Asenati Taugasolo Semu.
E solitulafono le faia o feuiaiga o tupe i ni faiga taufaavalea faapea ma faufauga faapilamika (pyramid scheme) ma ua fautuaina e le Afioga i le Palemia le mamalu o le atunuu ina ia ‘alo ese ma ai, ma ia ‘aua lava nei tuuina atu ni a latou tupe i ni fuafuaga faapea.
Na toe faamamafa mai e le Afioga i le Palemia, Tuilaepa Dr. Sailele Malielegaoi i lana polokalame ma le TV 1 i le vaiaso ua te’a, ma o lea tulaga ua mae’a faalauiloa foi e le Faletupe Tutotonu o Samoa faapea le Matagaluega e Atiinae Pisinisi ma le Leipa.
O nei faiga ua faaigoa o le pyramid scheme poo le faapilamika, ma e tele ese igoa e pei o le “one coin” ma le “gift” (faameaalofa). E faamautinoa le faapilamika pe afai o loo moomia lou alu e aumai i totonu nisi tagata se toalua. Ona o foi lea o na tagata e aumai seisi lua, ma faasolosolo atu ai lava le pyramid.
Na saunoa Tuileapa ma tuuina mai ai nisi o faataitaiga o nei faiga o lo o faagasolo nei.
“O lo o i ai Tulafono i lalo o le tatou Faletupe Tutotonu e mafai ai ona molia tagata nei ma falepuipui..
“Soo se ituaiga fuafuaga faapea, fai mai e aumai lau tupe e $300, ae uma ane le tausaga e tasi tausaga ua maua lau $12,000. A o ai a le tosina i ai? A o tagata ia pito tosina i ai, o nai tatou tagata foi ia lima vaivai.
“E i ai mea faapena lea e fai nei e le toatele o tagata ua lavevea ai i le alu atu lea i Siusega agai i Tafaigata ma Faleula ma Vaitele. Ua feoai ai le au taufaavalea. A o mea uma lava nei, e faapea na fuafua. A aumai nei lau tupe o laitiiti, e uma ane le tasi le tausaga ua fanau mai le fia afe ma afe o tupe. E mafai ona e milionea i le tausaga e tasi.”
Ua faailoa atili e Tuilaepa, o le faufauga faapilamika (pyramid scheme) ua tele tagata ua aafia ai i tulaga tautupe ona o le naunau i le tupe vave ma le fia maua o ni tupe se tele.
“Ua faaigoa lea faiga o le pyramid scheme, po o faufauga faapilamika. O le ituaiga faiga lea e to’a 20 tagata e amata ai, ona faapea lea o le to’alua lea, a atoa loa le 20 tagata e maua mai ai le ta’i $300, lona uiga e maua ai le $6,000.”
Na faamanino e Tuilaepa, e tasi a le vaiaso ae maua le $6,000 i le 20 tagata. Ona faapea lea o le to’alua lea na amataina le faiga lea, e tuu le $3,000 ma laua ae ave le isi $3,000 ma isi tagata, ma e faaauau pea le aumai o tagata i totonu ma tupe ta’i $300 ma oo atu ai le aofai o tagata i le 58.
“O lona uiga e maua le tupe pe a tupu pea tupu pea, ma manuia ai tagata ia e pito i luga. Pe oo loa lava i le toasefulu, ita loa ma isi omai loa fai mai e aveese mai a latou tupe. Ae manatua ua leai se tupe, ua uma ona tufa ua leai se mea. Amata loa lea na faaletonu.
“O le ala lena e lavea ai le vaega foi lea e fai i ai e faatali, faatali toeitiiti taunuu mai le tupe, ae fiu e vili le telefoni ae sue atu fai mai ua feoti. O le faapuupuuga lena o ituaiga mea valea uma lava ia e fai nei, e faaigoa o le pyramid scheme.”
E lē faatagaina i Samoa nei faiga faasolitulafono, ma na fautua Tuilaepa, e lelei le teu pea o tupe i Faletupe.
“O le tele o nei mea e solitulafono uma lava. E le faatagaina i Samoa. Lea ua ou ta’u atua. E leai se mea e tutusa ma lou nofo lava o oe, a i ai sau tupe, ave e teu i le faletupe, pe ave e teu i le UTOS, o mea mautinoa na, a o mea nei, e matua le mautinoa lava.
“Lea na fai le one coin (faiga faapilamika). Sau le isi faifeau fai mai ia te au, manaia o le mea lea o le one coin, ae na ou fai i ai, aua e te alu i ai e te lavea ai.
“Na o’u faalogo, tasi lena faifeau na matuā gau ai, e le i faalogo i la’u upu. Ma le anoano o isi faifeau, o le toatele lava i totonu o Niu Sila. E $3 miliona ga gaugau ai. E lavevea ai lava faifeau ma Ekalesia.
“O la’u fautuaga ia latou nei, ‘aua, ‘aua, ‘aua nei outou faia se mea faapea. Lea foi e i ai le isi vaega ua faaigoa o le gift. E eseese le faaigoaina. Na amata o le one coin ae sau nei ua gift po o le faameaalofa.”
Na faailoa foi le popolega o Tuilaepa, ona ua ta’u ai ma lona suafa ma ona ata e tagata taufaavalea.
“Telefoni atu i lo’u ofisa e maua ai le sa’o, ma ou te le avea se ioega i se mea valea faapea.”
E leai se mea eseese ai lea faiga ma isi foi mea faapea e fai i totonu o afioaga e pei ona saunoa Tuilaepa.
“E tai pei lava le ituaiga faiga lea o le faiga lea e fai tatou nuu i tua. Na fai e nisi nuu, ma e fai fai lava uma. Lea e omai ai taulelela pe toa 50 o le nuu, ma faapea e fai se tatou faiga lea, tatou o e lalafo le vao, ona toto lea o le tiapula e 10,000 a le taulealea e faasolosolo ta’ito’atasi i lea vaiaso ma lea vaiaso. Uma le vaiasso lenei, oo atu i le isi taulealea. Uma lena vaiaso oo atu i le isi taulealea. Pe uma le toasefulu ae misa loa malepe loa ma le faiga lea. Ae manatua na o le toasefulu lea ua uma ona fai le lafo lea ua manuia, ae oti atoa le isi vaega lea e le i oo i ai le faasologa.”
Na toe faamanatu e Tuilaepa, e i ai le ulugalii, o le papalagi mai Peretania ma le tamaitai Samoa na molia ai i tausaga ua mavae i ituaiga solitulafono i faiga e faagaioi ai tupe faapea aemaise o faiga faagaoi faapea mai atunuu i fafo, ua fano ai tupe a le toatele o tagata.
“O le isi ituaiga mea na lavea tele ai tatou, i ituaiga mea faapea, e amatamea ai tagata nuu Nigeria, ma e toatele loia ma faauluuluga o isi kamupani na lavevea ai. Ituaiga tagata foi ia e fia milionea.
“Ae amata lava i le tusi mai faapea…O le tama o lo’u tama ua oti a ua tuu ma ia te au se tupe e tusa ma le $100 miliona tala lea ua fai ai la’u faaiuga, o le a avatu uma le $100 miliona ia te oe. “Ae vave lafo mai lau account number ia te au, ou te manao e vave avatu, ne’i te’i ua oo mai le oti ia te au.”
Na saunoa Tuilaepa, o ituaiga taimi ia, e le toe moe le tagata lea aua ua manao i le tupe.
“E le toe moe lea, ua le mafai na moe aua e taoto atu i lalo ae vaai atu na o le miliona ma miliona mea ia ua vaai i ai. Ma mafaufau po o a mea a fai i lenei tupe tele. Fai ai ni ona fale tetele, pe alu ai e tafao i le lalolagi. Oo loa i le aso na sosoo ai, vili loa i ai ma fai i ai, faafetai tele lava, o lau account number lea e lafo sao mai lava i ai le tupe. Ae uma lena toe sau le isi valaau faapea e i ai si lavelave lea e i ai, ona o totogi o galuega tau pepa, aemaise aso nei i le faigata tele o mea nei o tulafono o faletupe, e moomia ai se $50 afe i galuega tau pepa, na o le $50 afe lava.”
“Ia e le faatusa lenei $50 i lenei 100 miliona o le a maua. Sau loa le sui lea o lo o i ai lana $30 afe o lo o teu, alu loa tauanau le fanau e omai e faamaonia lana nonogatupe e faalava ai le $50 afe, ma fai le folafolaga i lana fanau e tofu le tamaitiiti ma le miliona pe a maua mai le $100 miliona. “E i ai la le tamaititi ua na iloa, ua fiu e fai atu i ai, ae ua le mafai ua na o le fetuu e le tama o le fanau, ona o lea o le fanau fai le nonogatupe ma le iloa o le mea valea le mea. A o le a le mea o le a fai ua manao le toeaina e fai. $100 miliona. O loa fai le loan aumai ai le $20 afe. Fai lava e le fanau, ae le iloa o tupe tiai, ae sei faamalie le latou tama.
“Lafo loa le $50 afe, ae sau ma le telefoni, faafetai, lea ua kilia mea uma. Lea o le a faalele atu i Niu Sila le tupe. Leaga e fai si lapopoa o taga tupe.
“Ae toe sau loa ma le isi telefoni. O lea ua i Niu Sila taga tupe ae faatali mai le vaalele o le Ea Niu Sila lea e alu atu taeao. Ae vaai oe, toe $10 afe e manaomia e fai ai le inisiua, e tatau ona inisiua tupe ne’i tei ua avatu gaoia e se isi.
“Ia ona toe o lea fai le isi loan maua mai ai le $10 afe toe lafo loa. Na ona alu atu lava o le tupe lea ae sau ma le telefoni, faafetai tele lava, o le ta o le iva nanei e taunuu atu ai le vaalele, o ane ma ni taavale e leaga fai si tele o taga tupe.
Ae taunuu mai le Ea Niu Sila, fiu e faatali. Fesili atu i le auvaa pe le i aumai se faamomoli, ae siaki atu e leai se mea. Tago atu e toe vili ua pe mai le telefoni, e atoa le vaiaso fiu e telefoni ae sau le leo, o le tagata e ana le telefoni ua sui. A o lea ua matua malaia ai lava.
“E tele tagata o tatou ua lavevea ai. Lea ua ou talatalanoa atu i le tele o tagata taufaavalea i le lalolagi.”
