E fitu itumalo palota o le toe foi e filifili o latou sui usufono mo le Palemene o Samoa, ma ua faamaonia mai e le afioga i le Komesina o Faigapalota ia Faimalomatumua Mathew Lemisio, e toa 16,862 le aofai o suafa i lola palota nei e fitu.
I se faatalatalanoaga ma le afioga ia Faimalomatumua na tā’ua ai e lei maua mai se aso mautu mai le afioga i le Fofoga Fetalai, Papalii Li’o Oloipola Ta’eu Masipa’u, ae lē o tuua ai tapena masani a le Ofisa o Faigapalota.
“O loo faaauau pea tapenaga a le Ofisa.. Poo lea lava la le taimi e tuuina mai ai le poloaiga a le Fofoga Fetalai mo se aso atofaina mo palota laiti, ae ua maea ona faatino tapenaga uma”.
Sa tā’ua e Faimalomatumua, o le ā gaioi lava le Ofisa o Faigapalota e faataunuu faasalalauga masani e faalauiloa ai mo le silafia o le mamalu o le taunuu, pe a taunuu atu se poloaiga aloaia a le afioga i le Fofoga Fetalai.
Sa saunoa le Komesina, e le o iai lava ni suiga tele mai le faigapalota na mavae atu nei.
“Ae e ao pea ona faamanatu tulaga o loo tumau pea i lalo o le tulafono e pei o le faatosina, faapea aiaiga mo komiti a sui tauvā”.
Sa faamautinoa mai foi e Faimalomatumua, e leai se suiga o lola palota, sei vagana ai ē ua tai 21 tausaga talu mai le tapunia o lola palota talu ai.
“O itumalo e toafitu o le a faatino faigapalota laiti e 1,103 le aofai o pre-polling ae 16,862 le aofai o latou e agavaa e toe filifili i faigapalota laiti”.
O nisi o suiga o le a iai nei talu le toe teuteuina o le Tulafono o Faigapalota, o le toe foi lea o Samoa i Special Booths poo Palota Faapitoa. I le agavaa o sui tauvā, o lea ua mafai ona tuuina mai a latou monotaga faalelotu e agavaa ai, ae ua lē na o monotaga faalenuu e pei sa iai mo le faigapalota talu ai. O le a tasi foi le aso mo le pre-polling ae le o le vaiaso atoa.
O Itumalo nei e 7 o le a toe foi mo Palota Laiti:
1) Sagaga 2: Sa pa’ū le afioga ia Seiuli Ueligitone Seiuli ina ua molia o ia e le isi sa fai foi ma sui o le HRPP ma le Minisita Lagolago; ia Maualaivao Patelesio Ah Him.
2) Sagaga 4: Sa faamavae le afioga i le alii loia ia Tuisa Tuimasealii Tasi Patea ina ua molia o ia e le sui tauva a le FAST ia Tagaloatele Poloa. O le fautuaga a le Faamasinoga, a faamavae sui tauva ina ia lē taunuu ai le faamasinoga, e le tatau la ona toe tauva mo faigapalota laiti.
3) Aleipata Itupa i Lalo: O se sui tauvā a le HRPP le afioga ia Fiugalu Eteuati Eteuati sa manumalo, ae ua toe pa’ū ina ua molia o ia e le isi foi sui tauva a le HRPP ia Tafua Maluelue Tafua.
4) Falealupo: Sa manumalo le afioga i le tamaitai loia ia Leota Aeau Tima Leavai ae ua toe faamavae o ia ina ua molia e le sui tauva o le FAST ia Fuiono Tenina Crichton.
5) Falealili 2: Sa pa’ū le afioaga ia Fuimaono Teo Samuelu Atiifale ina ua maea ai le iuga o le faamasinoga ma le sui o le FAST ia Veletaloola Fuimaono Lotomua Avauli.
6) Aana Alofi 2: Sa pau Aiono Afaese Toleafoa ina ua maea le Faamasinoga ma le sui rauva a le FAST lost his seat through a court petition against him by a FAST woman candidate Lolomatauama Eseta Fa’alata Mata’ituli.
7) Safata 2: Sa faamavae aloaia lava le afioga ia Nonu Teo Lomialagi Lose Niumata ina ua molia o ia e le suitauva a le FAST.
