“E Sili ai Lava Pe Ana Matou Nonofo i Matou Aiga i Samoa”

Na faaalia e ni atalii se toalua mai Samoa i luma o se komiti faalepalemene a le Malo o Ausetalia, le Senate Select Committee on Job Security ni lagona ma aafiaga o loo feagai ma i latou o loo galulue i galuega faavaitaimi i lea atunuu, e ala i aafiaga o nofoaga o loo aumau ai i taimi o galuega, o meaai, vai taumafa ma le lē lelei o le tausiga o i latou faapea le tele o deductions poo tupe toese mai a latou totogi.

“E sili ai lava pe ana matou nonofo i matou aiga i Samoa..”

O le saunoaga lea a le alii o Talipope Kalolo, sa la oo atu e molimau i le suesuega a le senate ma le alii o Aleki Muese. Sa auai atu foi nisi o alii mai Vanuatu e momoli atu foi a latou molimau i le tulaga o iai i latou. Na auai ai foi se misionare ma lona faletua o loo fesoasoani ma alolofa atu i nei alo o le Pasefika. Sa molimau le ulugalii ia Geoffrey ma Jane Smith e faamatala le tele o faafitauli o loo a la vaaia pea.

Sa maua uma avanoa o nei alo o Samoa faapea uso mai Vanuatu e faaleo ai ma faamatalatala auiliili tulaga uma o loo aofia ai i latou ao aumau ai Ausetalia. O nei foi molimau uma, sa mafai ona maimoa manino iai soo se tasi lava faapea le mamalu o le atunuu, aua sa faasalalau faalauaitele i luga o upega tafailagi poo le live stream a le Senate o Ausetalia. O loo mafai lava i le taimi nei ona maimoaina e soo se tasi le fofogaina o molimau uma o lenei suesuega, ma faitau i tala tusitusia – i luga o upega tafailagi a le Senate.

Na muamua ona tāua le leaga o nofoaga e pei o fale o loo latou nonofo ai, na taua e Talipope Kalolo i lana faamatalaga, e toafa i latou e nonofo i se potu pumoomoo se tasi, sei tulou.

Ae sa taua foi e lenei alii o le latou taimi usu o le afa o le fa i le vaveao, 4:30am, latou te tu’ua ai le fale e agai atu mo galuega, ae o le taimi manava o le 5pm i le afiafi. Ae a maea le vaiaso, e aumai pei silipi o totogi, e na o le tai selau tala o loo iai.

“O le matou tatalo faamolemole, ua matou pologa i le nofoaga o lo’o matou iai.”

Na oo foi se manatu a si nei atalii o Samoa i le tulaga i faatoaga o loo latou galulue ai e fai lava si pologa, e leai se vai e avatua mo i latou, seiloga lava ua tigaina i le aasa o le lā ona faatoa maua atu lea o se laveai mo latou.  A oo foi i taimi o timuga, e galulue pea, e leai ni ofu fa’atimu e faaogaina.

“Matou te laina, e leai lava se fesoasoani mo matou, leai se vai e sapalai mo matou i le mūgalā, sei vagana lava ua matou galala i le fia feinu, faatoa alatu se laveai”.

Na tāua foi e Talipope le tele o le aafiaga i latou totogi e maua i vaiaso taitasi, ona e le lelei le rate o tray o loo latou pikiina. O nei alo ua le totogiina i le itula, ae faatatau totogi i pusa latou te pikiina.

Saunoa lenei alo o Samoa, e na o le $3.00 i le $3.30 Ausetalia le tau o le tray, ma e iai taimi e le maua ai ni tray se tele pe afai e faaletonu le fua o laau.

“O le maualaga lava o le pusa e matou te pikiina i le aso o le 60, ae tele lava ina pau mai i lalo i le 30 poo le 40 pe afai e le lelei le fua o laau aina. E fesuisuiai lava faapena le maualuga o le matou tupe maua i le aso.”

Peitai o nei tupe maua, e uma lava ona toe aveese i deductions poo seleni e toesea e le kamupani. E aveese mai pe deduct le tau o le fale o loo nonofo ai e ui ina toafa i le potu. O le taavale o loo ave ai latou i le maumaga e galulue ai, faapea ma isi mau deductions, latou te le malamalama iai aua e lē lisia mai i pei silipi (pay slip).

Advertisment

Sa faamatala foi e lenei atalii, o i latou uma nei e toafa sa maua i le faamai o le koviti. E 10 aso o faanofoesea i latou i totonu lava o lenei potu e tasi, ae le taitai lava latou meaai sa momoli atu.

“I le taimi na a’afia ai i matou e toafa i le faama’i o le koviti sa matou nonofo faatasi i le potu e tasi mo le 10 aso. Sa leai lava se fesoasoani, e na o le tasi lava le matou faatau o meaai sa avatu. Mo le vaiaso atoa, ae lua toilet paper i le potu, lua fasimoli, tasi le fagu juice, tasi le falaoa, 2 moli, 4 saimigi. E le lava meaai ae toafa matou i totonu o le potu.”

I le saunoaga a Talipope Kalolo, na maea loa le 10 aso talu ona faanofoesea i latou, toe ave foi lea o latou i maumaga e galuelue ai. E leai nisi suesuega poo ni test sa faia, e iloa ai ua mou ese le faamai ma i latou.

O le taimi atoa na latou faanofoesea ai sa leai se latou tupe maua, aua ua le totogiina i latou. Ina ua toe foi i galuega, sa faaluaina uma deductions mai a latou totogi, e toe cover ai vaiaso e lua, lea sa nonofo ai ona ua maua i le koviti. O se faataitaiga, e sau le deduction o le taavale sa masani ona $50, ua aveese mai le $150 ona e faapea e tatau lava ona totogi vaiaso e lua ia na nonofo ai.

Saunoa foi le atalii sa iai se faalavelave na tupu mai i totonu o le latou galuega i le faatoaga o loo latou galulue ai. O se tasi o alii faigaluega poo se uso foi ia latou sa matapogia ao faatino le galuega, ae peitai, sa leai se lavea’i mai le pule sili poo se fesoasoani mo le aveina i le falema’i o si nei uso.

Sa latou taumafai lava e fesootai atu lo latou sooupu mai le Matagaluega e suafa ia Aufa’i ae peitai, sa leai se fesootaiga na mafai ona maua, ma leai ai lava se fesoasoani mo i latou.

“E mafua ona matou omai e galulue i Ausetalia nei, mo se fesoasoani ona e ausage nai o matou aiga i Samoa, e le lava le faasoa o le matou atunuu ae o lea na matou sulufa’i mai i Ausetalia mo se fesoasoani, ae peita’i, e lē o iai se tali mo matou i le taimi nei.

“E sili ai lava pe ana matou nonofo i matou aiga i Samoa.”

“Matou te fia iloa le aofaiga o tupe toesea mai matou totogi i vaiaso taitasi. E valu vaiaso na tuu e totogiina ai deductions ae peitai, o lea ua alu le 11 vaiaso o loo faaauauina pea”.

Advertisement

“O lea matou te tatalo atu faamolemole i se tou fesoasoani mai mo matou ua matou tigaina lava, e faalua ona sau le matou totogi e $100 mo le vaiaso atoa. E leiloa pe faafefea ona fai lenei seleni e le lava le matou faasoa faamolemole.”

Sa saunoa foi le Minisita o Galuega Alamanuia ma le Leipa o Samoa i luga o le ET Live, le afioga ia Leatinuu Faumuina Wayne Sooialo, e faapea ua ia umia nei ni kopi o pei silipi o nisi o alo ma fanau Samoa i Ausetalia.

Sa saunoa le Minisita i se faatalanoaga ma Tui Eti Taualapini, e matautia tupe toesea mai totogi o nisi o aufaigaluega i Ausetalia sa ia molimauina.

“E sau lava le deduction mai le pito i luga e tau i le pito i lalo..”

Sa faamatala e le Minisita le piece agreement, ua fua ai totogi i le aofaiga o apu e tau, ae le o le $25 Ausetalia lea e tatau ona iai. Sa ia saunoa foi le lē lava o le faamalamalamaina o nei konokarate i alo ma fanau ae lei o ese atu mai Samoa.

“O isi konokarate e saini i le vaalele ae lei oso i le vaalele”.

Saunoa Leatinuu, o le a suesueina nei e le Labour Mobility Committee a Samoa lenei mataupu. “O lea o le a amatalia nei le galuega a le komiti lea, e taitaifono ai le Palemia ae Sui Taitaifono ai a’u”.

Saunoa Leatinuu, ua ia fautuaina le Kapeneta e seize loa galuega faavaitaimi i Ausetalia mo le taimi nei, ae o loo faaauau pea ni malaga ua maea ona fuafuaina mo Fepuari ma Mati.

Sa faamalosiau mai foi le Minisita i alo ma fanau o loo galulue faavaitaimi i Ausetalia, e aua le tuua latou finagalo faaalia ma faamatalaga tuusao mai i lenei mataupu.

Saunoa le Minisita, “E leai ma se afaina o lau galuega o loo faatino iina, pe a faapea o loo iai se faafitauli e tatau ona tau mai ia matou ae maise a’u nei ma le Matagaluega..

“A faapea o loo iai se popolega faapea, a ta’u atu i le Matagaluega ae afaina ai, leai sau sa’o lava oe ia iā te a’u” – o le saunoaga lea a Leatinuu Faumuina Wayne Sooialo i luga o le polokalame a le ET Live i le po o le Aso Lulu.

O loo faaauau pea suesuega a lenei Komiti Faapitoa a le Palemene o Ausetalia, poo le Senate Select Committee on Job Security sa faatuina ia Novema 2021 e suesue ni ripoti ua tuuina mai e faapea ua afaina tele tagata faigaluega faavaitaimi, ma e le faatulafonoina aiaiga o galuega, faapea le tausiga o tagata faigaluega.

(2)