E ono toe Faamalosia Puipuiga mo le Koviti

0
303

“E ono toe faamalosia auala o puipuiga pe afai e faatuputupu laia le atunuu e aaafia i ‘auga o le faamai o le Koviti 19.” O le saunoaga lea o le Ofisa Sili o le Matagulega o le Soifua Maloloina, le Afioga ia Aiono Dr Alec Ekeroma.

Saunoa Aiono, “Ua amata ona toe faatino auala o puipuiga i soo se tasi e afea tatou falemai Tupua Tamasese Meaole i Motootua, faapea auaunaga i falemai faaitumalo. E le gata foi lea, ua tuuina atu feau lapata’i atoa ma fautuaga mo le atunuu ia faatino tui puipui o le Koviti 19.”

O se taumafaiga a le Matagaluega ina ia puipui mai le atunuu mai le toe sasao ma aafia ai o soifua ona o le faamai.

Na faailoa Aiono, “I faamaumauga a le Matagaluega, e toalua nisi ua faamauina le aafia ai i le Koviti 19 talua ona toe aliae le faama’i.”

Ua tuualalo mai ai le matagaluega e tauala mai le Ofisa Sili agai le atunuu, “Ia faataua auala o puipuiga e pei foi ona tatou faatinoina muamua talu ona aafia muamua tatou i le faamai.”

O le vaiaso na sei mavae atu nei, na faalauiloa ai tala i totonu o Niu Sila, le toe aafia ai lea o Niu Sila i le faamai o le Koviti 19. I le faatupuplaia o femalagaaiga i le va o Niu Sila ma Samoa, na tuuina atu e le Matagaluega o le Soifua Maloloina se faasilasilaga e fautuaina ai le mamalu o le atunuu ia faatino tui puipui o le koviti, ma ia faaauau faiga tau puipuiga.

O le aafia ai o Samoa i le faamai Koviti-19, na tapunia uma ai galuega, o aoga faapea potopotoga e pei o sauniga lotu, o faalavelave o maliu, o taaloga ma lotu faaleaiga ma soo se tuufaatasiga.

E oo mai le taimi nei, o loo faamauina pea le aofai 31 o soifua na fano ina ua pesia Samoa i le koviti, talu mai le tolu tausaga talu ai.