E iai le avanoa e tauva mai ai se tasi o matai mai le afio’aga o Falealupo i lalo o le fa’amalu a se tasi o Vaega Fa’aupufai a le Itu Agai e pei ona ia fa’amaonia mai.
I se fa’atalanoaga ma Fuiono Denina Chrichton, o se tasi o matai fai upu a le afio’aga o Falealupo, sa ia fa’ailoa ai e fa’apea, e to’alua sui o le latou itumalo lea ua mae’a ona resitalaina i lalo o le fa’amalu a le HRPP po’o le Vaega Fa’aupufai o lo’o ta’ita’iina le sa o le Malo i lenei vaitau, peita’i, o lea e le’i faia le fonotaga a le latou afio’aga po’o le itumalo foi.
Sa ia taua o le isi lua vaiaso o lumana’i e latou te feiloai ai, ma faamautinoa ai loa se sui o le a tofia e tamo’e aloa’ia i lalo o le fa’amalu a le Vaega e Agaia le malo (Opposition).
I lenei fonotaga na fa’ailoa ai e Fuiono e fa’apea, o le a fili ai i le tai se agava’a e tatau ona alu e fai ma sui o le latou Itumalo, aua ua loa tausaga o latou fa’ataua pea le Itu e Agaia le Malo.
Sa fesiligia po o lea sona finagalo i sui e to’alua lea ua fa’amaonia mai ua mae’a ona resitala mo le vaega fa’aupufai a le HRPP, ae sa fa’ailoa mai e Fuiono o le faitalia a lena o le tagata ia, ae o le latou itumalo e mau pea le taofi mo le Itu Agai.
I Tulafono e tolu e pei ona fa’agasolo pea lona fa’atalanoaina i tua i nu’u ma afio’aga ta’itasi, na saunoa ai Fuiono o lo’o te’ena e Falealupo Tulafono Taufa’aofi uma nei e 3 ma o le mafuaaga lena e tatau ai lava ona ‘autasi i se sui tauva e fia tamo’e i lalo o le fa’amalu a se tasi o Vaega Fa’aupufai e agaia le Malo.
Saunoa Fuiono o lo’o iai lona naunauta’iga e fia tauva i le faigapalota ae tu’u atu lava i le vaega o le a ‘autasi iai finagalo o Alii ma Faipule o Falealupo ma afai ae filifilia o ia o le a tauva loa i lalo o le fa’amalu a le Vaega Fa’aupufai a le FAST po’o le Fa’atuatua i le Atua Samoa ua Tasi lea o lo’o ta’ita’iina e le afioga ia La’aulialemalietoa Leuatea Polataivao Schmidt.
O le FAST lea ua galulue faatasi ma tu’ufa’atasia ma le Vaega Fa’aupufai a le SNDP.
O le taimi nei e lua lava sui tauva ua maea ona fa’amaonia e tauva mo le nofoa o Falealupo e aofia ai le Afioga i le tamaitai Loia ia Aeau Tima Leavai, o se alo e fa’asino i le Afioga i le Faipule o lo’o tu mai nei i le foe, le afioga ia Aeau Peniamina Leavai lea ua silia ma le 30 tausaga o ia tauaveina lenei tofiga i lalo o le fa’amalu a le Itu Agai.
O le isi sui tauva o se tasi o loo galue i le Ofisa o Tiute le Afioga ia Solia Tanuvasa Sefo Kalolo lea ua mae’a ona resitala i lalo o le fa’amalu a le HRPP.
O le masina o Oketopa i lona vaiaso lona lua lea ua fuafua le Ofisa o Faigapalota e tatalaina aloa’ia ai le resitalaina o sui tauva uma o le a tamomo’e mo le faigapalota a le atunu’u, lea o le a faataunuuina i le aso 9 o Aperila, 2021.
(0)
