Faa-Samoa

E na o le 4 Fautasi o le a Tausinio mo le Tuuga Fautasi o le Tutoatasi

March 27, 2023

E na o le fa fautasi o le a tauva i tuuga fautasi o le faamanatuina o le 60 tausaga o le tutoatasi o le Malo o Samoa.

O le fautasi a le afioaga o Toamua lea ua atoa iai le fā o fautasi o le a tausinio, poo ai e sola ma le faailoga tupe e $60,000 afe tala mo le tulaga muamua.

E tusa ai ma se faatalanoaga ma le Sui Komesina o Leoleo Papalii Monalisa Tiai-Keti, o le Aso Faraile o le vaiaso talu ai na faagata ai le avanoa mo soo se fautasi e fia resitala i le tu’uga.

Ina ua tapunia avanoa, sa faamaonia mai ai loa le fautasi mai Toamua, e faaopopo i le tolu sa lipotia talu ai – O le Segavao, Don Bosco ma le Tolotolo Tamauli mai le motu tele i Salafai.

E lei faamautu mai le igoa o le sā a le afioaga o Toamua, peitai, o tu’uga i tausaga ua mavae, sa tauva ai nisi o sa o le afioaga e aofia ai le Aviivii, faapea le Little Rina ma le La o Samoa.

Saunoa Papalii, “E le fou le afioaga i le fa’agatama i le tai.”

O le faamanatuina o le 50 Tausaga o le Tutoatasi a Samoa lea sā manumalo ai le fautasi a le Don Bosco na kapeteni ai le afioga ia Vaimasenuu Zita Sefo Martel ma ia faatuina ai se matātia o se tamaitai muamua ua ia tauaveina le faagatama i le tai.

O se tausaga ese lenei i le toalaiti o afioaga ua mafai ona tausinio i tuuga fautasi. O tausaga ua mavae, a pa’u le fainumera ua lima ni fautasi, ma oo atu lava i le 10 fautasi i nisi o tausaga.

Ua toalaiti mai le fainumera o fautasi tauva, ae ua oo tonu i le tausaga ua siitia ai le faailoga muamua i le onosefulu afe tala, ona o le faailogaina o le 60 Tausaga o le Tulafono o Samoa.

Peitai na ta’ua e le Taitaifono o le Komiti o Tuuga Fautasi, Auapaau Logoitino Filipo, masalo o le umi ona tutu o vaa, ua tele ai ina faaletonu ai fautasi, ma lē toe gafatia ai mo le faamoemoe.