Faaauau Suesuega a Leoleo i se Tamaitai 27 Tausaga na maua atu ua Maliu i lona Fale

E maua atu e nisi o aiga o lenei tamaitai talavou 27 tausaga ua maliu..

0
1567

O le faaiuga o le masina na tea nei sa maua atu ai se tamaitai, e faato’a 27 tausaga lona soifua, ua maliu i totonu o lona fale i Taufusi.

Sa maua atu lenei tamaitai talavou e nisi o lona aiga ua maliu, ae le mautinoa le mafuaaga.

Sa faamaonia mai lea faalavelave e le Komesina o le Matagaluega o Loleo le afioga iā Auapaau Logoitino Filipo ina ua fesiligia e le Samoa Global News.

Saunoa Auapaau, “O se tina mai Fugalei ma Letogo, sa maua lona tino maliu i totonu o lona fale i le faaiuga o le masina talu ai, ma o loo faagasolo iai suesuega a leoleo.”

Saunoa le Komesina o Leoleo, ua latou talosagaina le Pule o Maliu Lilo (Coroner) e faia se taotoga faapitoa e saili ai ma faamautu ai le mafuaga o le maliu ai o lea tamaitai talavou.

E lei mafai ona faamautinoa mai e le Komesina pe sa iai ni manuaga o lona tino e masalomia ai se faaoogalima ia te ia.

“O loo faatino suesuega a leoleo i le taimi nei.”

O se tasi o sui o le aiga e felātai i lē ua maliu, sa faapea mai, e iai se feeseeseaiga i le va o lona tei ma nisi o tinā o le nuu. Sa ia tā’ua fo’i, o loo iai manuaga i lona tino.

E lei faamautinoa mai pe iai se fanau a lē ua maliu.

O loo faaauau pea suesuega a leoleo, ma e leai se isi ua moliaina i lenei faalavelave.