E manatua pea le tautua mālō a lana afioga Hon George Michael Lober

0
131
Ata Pueina: Malo Samoa

SAUNOAGA TAMAITAI PALEMIA, AFIOGA FIAMĒ NAOMI MATA’AFA I TOE SAUNIGA – AFIOGA HON. GEORGE MICHAEL LOBER ASO TO’ANA’I, 4 ME 2024, MALUMALU O LE EKALESIA KATOLIKO LEPEA.

E muamua ona ou faatulou atu i le paia maualuga o lenei Sauniga.

Susū lau susuga i le Ta’ita’i o le Sauniga – lau afioga Patele Iosefo Vili, tainane le aufaigaluega totofi a le Atua.

Afio lau afioga i le Ao Mamalu o le Mālō

Afio le Sui o le Fono a Sui Tofia;

Le paia o le Tafatolu o lo tatou Malo

Afifio le pāia o āiga ua potopoto, o paolo ma gafa, uō ma e masani;

Aemaise le Faletua ma le nofoaalo

Ou te faatalofa atu.

O ituaso e sousou ai le vasa, ma ta’alili ai le matagi, o vaitau faigata ia o le tatou folauga. Peitai, tatou te faatuatua pea i le Upu a le Atua, ‘amuia ē faanoanoa, auā e faamafanafanaina i latou.

E ui i le matutui o tiga o le oti, ae le mafai ai ona faateaeseina i tatou ma le alofa tunoa o le Atua ua ia Keriso Iesu.

A o le tautua ma le sailimalo, aua Samoa ma ona tagata e ao ona sula ma faafetaia. O le agaga lea o lo’u tula’i atu i lenei taeao, ma le auai mai o le Malo, e faaleo le faafetai ma le faamalo i le tautua mālō a le afioga ia George Michael Lober.

O le afioga ia Hon. George Michael Lober na uluai ulufale i le Palemene o se tasi Sui Tuto’atasi i le Paeaiga lona 7, mai le tausaga 1979 i le 1982. Na toe filifilia i le paeaiga na sosoo ai mai le tausaga 1985 i le 1988. I lea paeaina sa tofia ai o ia e avea ma Minisita o Faamasinoga ma Leipa (Minister of Justice and Labour).

I lana ulua’i saunoga faa-taupou i le Maota i le aso 12 Tesema 1979, na ia ave ai le fa’amamafa i le siitia o totogi o tagata faigaluega, aemaise i latou uma o loo aumau i le talafatai o Apia, poo nu’u tu taulaga ua iloa ai nei aso. Na ia finauina foi tulaga i eleele e galulue ai i latou uma o loo alala i le talafatai o Apia. E faapea foi i le tatalaina o avanoa mo nonōgatupe mai le Faletupe o Atina’e e faatupe ai le fausia o maota ma laoa o le atunuu.

Hon George Michael Lober laid to rest, May 2024. Photos: Gvt Press Secretariat.

Sa ave foi lana faataua i tulaga tau auala tetele o le Malo i le taulaga o Apia ma le uunaia o fesootaiga tau telefoni ma uaealesi i le atunuu aemaise i le Taulaga. O lona ua 44 tausaga talu ai, le uluai lauga faataupou a George i le Maota, ma ua maoae suiga ua iai le faaleleia o tatou auala ma fesootaiga i le Taulaga o Apia i nei ona po.

E tele matāti’a na ausia e le Susuga ia George i tausaga na avea ai o ia ma Minisita o Faamasinoga ma Leipa. O le siitia o galuega a le Faamasinoga, faapea le vaaia lelei o tagata faigaluega e le gata i le Malo, ae faapea foi i le vaega maoti ma pisinisi.

O lea lava na matauina le faaauau pea o lana tautua i le atinaeina o pisinisi i le atunuu ma maua ai galuega a nisi o le atunuu aua le tausiga o aiga ma fanau.

E le galo le sao o lenei tamalii i upufai o le tatou Malo, aemaise o le fausia o Tulafono na lauliliuina e le Palemene i lena vaitau. E faapea foi i lona sao i faaiuga a le Kapeneta a o avea ma Minisita.

Le pa’ia o āiga, paolo ma gafa, lau afioga i le Faletua ma le nofoāalo, e lē itiiti le faafetai o le tatou Mālō i la outou lupe fa’alele. O ana galuega ma lona sao ia Samoa ma lona atinae, ou te taofi ua silafia e Le Atua, ma ua faamauina i le nofoalii o le alofa tunoa. Faafetai le tautua atunuu, faamalo le tautua malo.

O le tatalo a le tatou Malo, ia faamafanafanaina e le Agaga o Le Atua le paia o aiga. Ia faalototeleina le Faletua ma le nofoaalo. Ia maua pea le filemu, ina ua tatou mautinoa o le lagi o lo tatou Nuu moni.

Ia manuia lau Susuga i le Taitai o le Sauniga, aemaise Samoa ua
potopoto.

Soifua ma ia manuia.

Hon Fiame Naomi Mataafa, Palemia o Samoa