O loo ua suesueina nei e le ofisa o leoleo le mafuaaga o le maliliu o ni pepe i le vaiaso talu ai.
O se tasi o fanau e tolu tausaga sa lipotia mai i Upolu nei, ma se pepe sa fanau i le fale i Savaii.
I le feiloaiga faailevaiaso a le vaseg tusitala ma le Sui Komesina o Leoleo, afioga Papalii Monalisa Tiai Keti, na saunoa ai Papalii, “E lua ni maliu o loo faasolo iai suesuega a leoleo mo mafuaaga.
“O le Aso 14 o le masina nei na oo mai ai se valaau i le vaega suesue faapitoa a le matagaluega mai le falema’i i Lufilufi..
“O se pepe e tolu tausaga, o loo faapea mai sa moe ma maliu ai lava.”
O le isi maliu na saunoa iai le Sui Komesina sa lipotia mai i le falemai i Tuasivi.
“O loo tuuina mai faapea o le pepe na fanau i tua i lona aiga ma maliu ai lava.”
O ia maliu o loo faagasolo nei iai suesuega a leoleo e faamaonia i auala faapitoa le mafuaaga o le maliliu ai o nei fanau.
I lea lava tulaga ua alia’e mai ai le maliliu o le fanau, ua toe tuualalo mai ai le Matagaluega o Leoleo tauala mai i le Sui Komesina, ia tautuana le tausiga o fanau.
O tinā o loo sauni e tuu eseeseina ma se tagata fou, sa tuualalo mai ai Papalii e faaoga pea falemai, e maua ai le fesoasoani pe a oo i se tulaga e tulai mai ai ni faafitauli.
“E sili lava le vaai o se fomai aua le saogalemu o oe le tina faapea le tagata fou, ma oo ane pea i se falemai pe afai ua lata le taimi.”
Sa tuualalo mai foi le afioga i le Komesina Auapaau Logoitino Filipo i le vaiaso talu ai, ina ua maliu se tamaititi ae tigaina le isi, ina ua solo iai se fasitepu o se fale tuufua sa mapu iai le la la’ugā oneone.
