E Le’i Maua Se Tasi i le Feiloaiga a Afega ma Levi Saleimoa – Aso Gafua e Aumai ai se Finagalo o le Peresitene LTC

0
5259
O le maea ai o le feiloaiga i le Ofisa o Leoleo i Matautu. Aso Faraile 13 Oketopa 2023. Maulolo Faifua Alefaio Lutu in red. 📸 SGN Ganasavea.

E le’i maua se tasi I le faatofalaiga sa faia i le va o Afega ma Levi Saleimoa, e pei ona feiloai ai ma le Matagaluega o Leoleo i le Aso Faraile 13 Oketopa 2023.

Sa faatumulia le Ofisa o Leoleo i Matautu i matai o afioaga e lua, i se taumafaiga e soalaupule le mataupu tau tuāoi o fanua e pei ona oo atu iai Alii ma Tamaitai Malu o le Malo e toa tolusefulu i le Aso Tofi 12 Oketopa 2023.

Sa taape leoleo ina ua malilie matai o afioaga e lua, e faataunuuina se soalaupulega i le Ofisa o Leoleo i le aso e soosoo ai.

Sa taitaia le feiloaiga e Sui Komesina o Leoleo iā Papalii Efo Moalele ma Pauli Paul Tauaa le faatofalaiga, ma nisi o sui o le Matagaluegao Leoleo sa auai uma ai.

E silia ma le 20 matai ma taulelea o Afega faapea ma le silia foi i le 20 matai Levi sa auai ai. Ae o fafo mai o le potu fono sa tapuai atu ai sui o lau ofisa faasalalau.

Ina ua taape mai i tua le feiloaiga, sa saunoa mai ai le Susuga i le igoa matua iā Maulolo Faifua Alefaio Lutu, o le tele se faamatalaga e mafai ona tuuina mai, ae le’i maua se tasi i finagalo o itu e lua.

A o faasolo le faatofalaiga, ae taunuu loa se tusi e faailoa ai le finagalo o le Peresetene o le Faamasinoga o Fanua ma Suafa.

O le Aso Gafua o le a tuuina mai ai se finagalo o le Faamasinoga o Fanua ma Suafa e tauala mai i le Peresetene, e tusa ma le mataupu o loo fesiitai ai finagalo o afioaga e lua.

Ua taoto atu nei la le mataupu mo le vaiaso fou, e feiloai ai afioaga e lua ma le Peresetene o Faamasinoga o Fanua ma Suafa.

O fanua o loo tulai mai ai se feeseeseaiga, ua maea ona iloiloina i se faamasinoga sa faia i le 1960 e pei ona saunoa iai le igoa matua ia Maulolo Faifua.

O eleele e faaiogaina o le faatafafā a Fata ma Maulolo, e tusa ma le 723 eka, sa tuuina atu i le afioaga o Leauvaa e faamautu ma aumau ai.

O lea 723 eka, o eleele ia sa faamatuu atu e Fata ma Maulolo e nofoia e le afioaga o Leauvaa i lalo o le pule faamalumalu o Alii ma Faipule o Afega. Ae o eleele i tua atu o lea 723 eka, poo tua atu o le faatafafā a Fata ma Maulolo, o eleele ia e pulea e Alii ma Faipule o Afega.

A satellite image of the area showing Afega, Leauvaa and Levi Saleimoa.

E pei ona silafia i le tala faasolopito o Samoa, o tagatanuu o Mauga ma Samalaeulu mai le Itumalo o Gagaemauga i Savaii, sa sosola mai i vaa ina ua aafia i le mauga mu o le 1905-1911 (volcano eruption of Mt Matavanu).

E tusa ai ma le saunoaga a Maulolo Faifua, o le agai atu o Afega e sua se auala galue i fanua ia o loo i tua mai o le faatafafa, lea o loo tulai mai ai le feeseeseaiga.

O le mau a matai Levi Saleimoa, o fanua ia a le latou fo’i afioaga, ma ua maea ona faaulu sa latou talosaga apili i le Faamasinoga o Fanua ma Suafa.

Ae o le mau a le afioaga o Afega, ua uma ona taoto iai faaiuga a le Faamasinoga o Fanua ma Suafa i fanua tonu ia o loo vevesi ai.

Ina ua maua se fesootaiga ma le tofā ia Malolo Tavita Amosa, na ia saunoa mai ai, o le Aso Gafua e ono maua mai ai sana faamatalaga pe a maea le feiloaiga ma le Peresitene.

O le a toe faauau se tala faaopoopo o lenei mataupu, pe a maea le feiloaiga a le Peresitene o le Faamasinoga o Fanua ma Suafa ma afioga e lua.