Faa-Samoa

E le’i manuia Sailiga mo se Tamā sa agai e Fagota

"O lea ua taufaa'iu'iu le tatou savaliga o lenei tausaga e mafuta faatasi ai matua ma fanau, ae ia faamuamua lava le saogalemu."

Ganasavea Manuia Tafeaga

October 26, 2023

352

E le’i manuia sailiga mo se tamā mai Faleapuna na agai e fagota i le faaiuga o le vaiaso, as le’i toe foi mai o ia i le aiga.

Sa faamaonia mai lea tulaga e le Komesina o le Matagaluega o Leoleo, le afioga iā Auapaau Logoitino Filipo.

Saunoa Auapaau, “O le faaiuga o le vaiaso na lipotia mai ai se tamā mai le afioaga o Faleapuna..”

“Sa agai o ia e fagota ae le’i toe foi ane lava.”

Saunoa Auapaau na mafai ona tali atu le Matagaluega o Leoleo i le vaega e gafa ma faalavelave faapenei i luga o le sami faapea foi ma le Pulega o Tineimu ma Faalavelave Faafuasei (FESA).

“Sa faatino le sailiga peitai e le’i maua lona tino.”

“Masalo si tamā lea ua malemo (sei tulou) ua mafua ai ona tulai mai le faalavelave.”

Ua toe tuuina mai ai se tuualalo mai le Matagaluega o Leoleo o loo gafa ma le saogalemu o le atunuu e tauala mai le Komesina.

“Le mamalu e o le atunuu, ia tautuana le saogalemu ia faamuamua, aua foi nei naunau i le i’a ae manumanu i le upega, o lea ua taufaa’iu’iu le tatou savaliga o lenei tausaga e mafuta faatasi ai matua ma fanau, ae ia faamuamua lava lo outou saogalemu.”