E lei faigofie i Malu o le Malo le faatinoina o le latou tiute o le faatoafilemu lea o se vevesi poo se felafolafoaiga na tulai mai i le va o Afega ma Levi, Saleimoa.
Na faamaonia mai e le Sui Komesina a Leoleo, Papalii Monalisa Keti, “E silia ma le 30 leoleo na auina atu mo le tausiga o le filemau. E lei faigofie ona o mataupu tau fanua.”
Saunoa le Sui Komesina, “Na faamuta lava le galuega i lea taimi, ina ua malilie afioaga e lua e faia se feiloaiga faatasi ma pulega a le matagaluega i le aso a taeao (Aso Faraile 13 Oketopa).”
I se finagalo o se tasi o matai o le afioaga o Afega, le Susuga le igoa matua Maulolo Faifua Alefaio Lutu, “Ua mae’a Faamasinoga o Fanua e pei ona tulai mai ai feeseeseaiga. Ua iai foi faaiuga o Faamasinoga e pei ona faatumauina ai eleele ua faaigoaina o le faatafa’fa Fata ma Maulolo, lea e tusa ma le 723 eka lona tele.”
“Ae o le eleele tua atu o lena 723 eka, e agavaa ai soo se afioaga e galulue i lalo o le pule faamalumalu a Fata ma Maulolo, ma o le agai atu la Alii ma Faipule o Afega e faatino la latou pule i ona lava laueleele e patino lava ia Afega, o nei eleele e tuaoi mai ma fanua o le afioaga o Levi Saleimoa.”
Na taua foi le Susuga le igoa matua, “O eleele lava nei ua mautu faaiuga o faamasinoga na faia ai, lea e pei ona taumafai mai ai nisi foi o itu pei o le afioaga o Leauvaa ma Tuanai.”
“O le tausaga talu ai na agai ai foi le pule mamalu o Alii ma Faipule o Afega, ma faatino se faatoaga talo ma taaamu i eleele lava e patino i afioaga o Afega. Peitai, na toe taofia lea faatoaga ina faia se soalaupulega i le va o afioaga o Afega, Tuanai, Leauvaa ma Levi Saleimoa.”
“O le soalaupulega sa faia ao tulai mai Tuilaepa Sailele i le taitaiina o le Malo, ma fautuaina ai le afioaga o Afega mo se isi auala e maua ai le filemu, aemaise o loo taoto le apili le afioaga o Levi i faamasinoga o nei fanua.”
O le vaiaso na mavae atu nei na amata sua ai e le afioaga o Afega se auala galue i vaega tonu o loo finau mai ai foi Alii ma Faipule o Levi, o latou eleele.
Na taumafai atu mo se finagalo o le Tama o le Itumalo, le Susuga Maulolo Tavita Amosa, aua o le Faipule o loo avea ma taitai o le itu o le afioaga o Afega, ae peitai e lei manuia.
O loo tālia se faaiuga a le soalaupulega lea sa tāua e le afioga i le Sui Komesina iā Papalii Monalisa, o loo faataunuuina i le asō.
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
