E leai se faiga faasolitulafono e fesootai ma le maliu o se alii turisi

0
400
Police Commissioner Auapaau Logoitino Filipo.

Ua tuuina mai nei e le Pule o Maliu Lilo lana faaiuga e faamatuu atu ai le tino maliu o se alii turisi i ona aiga, ma ua lē moomiaina se taotoga faapitoa.

O lenei faaiuga ua mautinoa ai e leai se faiga faasolitulafono e fesootai ma le maliu o lenei alii turisi, 31 tausaga.

O faamaumauga ma suesuega a leoleo, o le Aso 23 o Mati na taunuu ai i laufanua o Samoa nei lē ua maliu ma ona matua, peitai, o le Aso 25 o Mati na maua atu ai lona tino maliu i le potu o se faletalimalo na mau totogi ai.

O loo tapu ona faailoa le faletalimalo faapea ai ma le atunuu o lē ua maliu ona o tulaga i le puipuiga.

Sa tuuina mai le faaiuga ma se poloaiga a le Pule o Maliu Lilo le Coroner, ina ua maea ona suesueina lipoti uma, faapea ma faamaumauga ma faamatalaga e faatatau i le soifua maloloina o lea alii turisi.

E pei ona tuuina mai i faamaumauga, sa iai se gasegase tumau i le soifua o lenei alii turisi, ma ua faamalieina ai le Pule o Maliu Lilo.

O le saunoaga lea a le Komesina o le Matagaluega o Leoleo, le afioga iā Auapaau Logoitino Filipo.

Saunoa Auapaau, “O taunuuga ia o suesuega a le Matagaluega o leoleo lea na faaoo atu i le Pule o Maliu Lilo.”

O le tuuina mai la o le poloaiga a le Pule o Maliu Lilo, ua mautinoa ai e leai se faiga faasolitulafono e fesootai ma le maliu ai o lenei alii turisi i Samoa nei.

Ua mafai loa ona faamatuu atu lona tino maliu i lona aiga mo le tapenaina o ona toe sauniga masani.