Ua teena e le faamasinoga le tatala ai i tua o ni alii talavou e to’afa lea na molia i le faaoo ai o le oti i le alii faipisinisi Saina i Vaitele ia Oketopa o le tausaga ua mavae.
O le asõ lea sa toe valaauina ai le mataupu faasaga i lea aualii, e tau saili se aso talafeagai mo le valaauina ai o mau a le itu a leoleo.
O Gogosina Leilua, Mikaele Leilua, Tafi Samuelu ma Kome Sioeli o loo teena o latou moliaga o le fasioti tagata, fuafua e faaoo le oti, faomea, talepe fale, faaoolima ma le faaupegaina i aupega matautia.
O le Aso Lua 21 o Ianuari lea o le a toe fofogaina ai lenei mataupu ina ia faatulaga mai ai se aso e suesueina ai i luma o le faamsinoga, ina ia vave ona faagasolo ona o loo taofia pea i latou nei e toafa talu mai lava le taimi na molia ai e leoleo.
