E lē Tatau ona Taomia le Faaalia o Taofi i Totonu o le Palemene o Samoa

0
2727

Sa faaali le lē fiafia o le Afioga i le Alii Palemia ina ua tuuina atu e le Sui Palemia, le Afioga ia Fiame Naomi Mataafa, se fautuaga e toe liuliu tofa se finagalo o le Palemene, i se tasi o suiga o le tulafono o Faiga Palota 2020, lea sa tuuina mai i luma o le Palemene mo lona faitauga lona tolu i le taeao ananafi.

O le mataupu sa talanoaina o se teuteuga o le tulafono o Faiga Palota 2020, e faapea mai ai, o le mea e palota iai le tagata, e faavae lea i luga o le mea e nofomau ai; ma se fuaiupu ua faaopoopoina nei e faapea, “E na o le tasi lava se nofoaga o se tagata e mafai ona nofo mau ai.”

E ui o lenei teuteuga e faasino i tagata palota, ae sa saunoa le Sa’o Faapito, ua faatupu manatu lenei tulaga pe a faatusa atu foi la i sui tauva.

“Aua o sui tauva fo’i o i latou foi o isi tagata palota, ae atonu o le a iai foi la se aiaiga, ia nofomau le sui tauva i le itumalo o le a tulai mai ai”.

Sa saunoa Fiame, o loo ia malamalama manino i teuteuga ma e leai foi se manatu e teteee pe faaleaga. Ae peitai, ua faatupu manatu le saunoaga a le Alii Palemia – ia  faatauaina a tatou tu ma aganuu Samoa i totonu o a tatou tulafono, ae maise le Tulafono o Fanua ma Suafa sa saunoa iai le Alii Palemia i lenā lava taeao.

O le auga o le lagona o Fiame, o se tuufesili pe fesootai le mau e faamuamua tu ma aganuu, ma suiga ia ua aumai i fuafuaga faa faigapalota.

“Lau afioga i le Fofoga Fetalai. Afai ua faavae a tatou faigapalota i luga o le faamatai – O le faasinomaga o le tagata Samoa, O lona aiga ma matai o aiga. Pe o le a avea a tatou fuafuaga i faigapalota, pei e tatou see ese mai ai, i le faavae lea?”.

Sa saunoa le Sui Palemia ua leva foi ona manunatu i le tulaga lea, mai lava i le taimi ao fai foi o ia ma Minisita o Faiga Palota e pei ona iai i le nofoaiga talu ai a le Palemene. Sa ia laulauina foi le tele o suiga ua maea ona tapena i lea lava tulafono – e pei o le vavaeina o itumalo, ma le aiaiga lea ua iai nei, e tatau ai ona faatino lau palota i le nuu o e resitara ai.

O se faataitaiga na tuuina mai e Fiame, “O lea foi la ua faapea mai, pe faapefea la tagata ia e nonofo i Apia e tatau ona o i tuā, pe o i Savaii e faatino ai latou palota. Ae o lea lava ua tatou talia – afai ā o le lagona lena o le tagata, e tu lava i luga ma alu.”

Sa faaiu le saunoaga a le Sui Palemia i le fesootaiga o le nofomau, ma le faasinomaga o le tagata Samoa.

Saunoa Fiame, “O lea le faauigaina o le nofomau? O le nofo i aso faipea”.

“O lea la le faafeagai o le nofomau lena, ma le faasinomaga o le tagata Samoa? E toe fia foi i lona aiga, e faatino ai lana palota?”

O le tuuina atu la o le fautuaga a le Sui Palemia e toe liuliu tofa le Palemene ona o lea e lava le taimi – na faauilavea mai ai loa le Palemia ma faapea mai, sa tatau ona oo atu le Sui Palemia e faali ona finagalo i le Komiti faapalemene sa gafa ma le iloiloina o teuteuga.

Sa otooto mai foi e le Palemia le talaaga o teuteuga i le Tulafono o Faiga Palota e masani ona faatino, pe a maea palota taitasi i tausaga ua tuanai.

Sa ia saunoa foi, e leai lava se taimi e faatino ai teuteuga o se Tulafono taufaaofi, e le tulai mai ai nisi e tetee.

“Lau Afioga i le Fofoga Fetalai, O le ā lava le taimi tatou te faia ai lea tulafono ma lea tulafono – gaoioi loa ma le tiapolo e kalepe. Aisea? Leaga e lē ke’a kakou ma le kiapolo”.

“O manatu ia sa avatu i le taeao nei e faapitoa lava i le mataupu o Faamasinoga, ae o le tulafono lea tatou te talanoaina…o le tulafono o Faiga Palota, ua leva na i le Komiti. O la’u tatalo – faagasolo le tulafono i le tulaga o iai nei.”

Sa toe tula’i Fiame ma saunoa mai e tonu lava le finagalo o le Palemia, ae peitai, sa iai sona lagona maualuga – a iai ni mataupu e tulai mai, o le a lē taomia le faaalia o manatu.

“O a’u foi le isi sui ua leva i totonu o la tatou palemene, ae maualuga lava lo’u faamoemoe o le maota lenei o le atunuu, e malu a tatou fetufaa’iga ma ni faaaliga tofa”.

Sa liliu ane loa le Sui Palemia, “Ia, Tuilaepa, ua e saunoa mai ea o le tiapolo lea e tu atu, ona o le faaali atu o ni manatu? ….Leai tatou talanoa.”

Sa fa’asalavei le Alii Palemia ma faapea mai, “E iai le mea e ta’u o le Collective Responsibility a le Kapeneta”.

“O sa’u Minisita e lē ioe faatasi, lā e iai lou avanoa e faamavae mai ai, a’o le i’uga ua ou avatua – e tatau ona faalogo mai uma outou Minisita o le Kapeneta.”

Na liliu mai loa le Palemia i Minisita uma o le Kapeneta ma lana faatonuga, afai e iai se isi e le auai i teuteuga o tulafono, ona faamavae mai lea.

“E tatau ona faalogo uma mai iai outou Minisita o le Kapeneta, afai e te le auai – Ua e iloa le mea e tatau ona fai;

“A lea ou te tulai atu o a’u o le taitai o le Malo, o lea foi e taumafai ina ia faagasolo a tatou galuega ina ia sologa lelei i le filemu, ua leva ona fonoa le komiti;

“O le ā le mea na ē le alu ai e ave au mau, avane i totonu o le Kapeneta?”

Sa toe tula’i Fiame e lagolago le finagalo o Tuilaepa i le tulaga o faaiuga a le Kapeneta, ma momoli malu i puega i le finagalo o le Alii Palemia faapea le Minisita e ou le Tulafono, ma toe faamanatu lana mau, e le o se tetee atu i suiga, poo se taufaaleaga. Na te malamalama foi ona o ia sa fai ma Minisita o Faiga Palota.

“Ae a tatou lē faia le tala i le taimi e tatau ona fai ai, ma tatou malu i a tatou fetufaaiga? Ae o lea e fai atu i le agaaga o le loto maualalo..”

Sa faapea mai foi le Sui Palemia, e iai lava nisi mataupu e fai e isi, ae le lagolagoina e isi Minisita.

“Ia, o mea lava e fai i lalo nei”.


Maina Vai