26 Mati 2021, Lepea, Faleata, Samoa. E ui i le mamafa o uaga i le taeao nei, e lei toloa ai le faamoemoe o suli ma feoi o le suafa Faumuina le Tupufia i Lepea ina ua faae’e atu le suafa i le nofo fou e pei ona filifilia mai ai e le Faamasinoga lē sa avea ma faifeau, o ia foi ua avea nei ma Faamasino o le Faamasinoga o Fanua ma Suafa; le Afioga ia Leilua Opapo Soana’i Oeti.
Ua loa tausaga o tuua mai le suafa Faumuina, ina ua tuumalo le Afioga ia Faumuina Anapapa o le sa fai ma Sui Ao o le Malo o Samoa, i le masina o Iuni 2016.
Ua silia nei ma le 14 tausaga talu ona aganoa le nofoa o lea foi suafa maualuga i le atunuu.
E faitau afe tagata sa auai ai i lea foi aso e ono faamanatu pea i le tala faasolopito o le atunuu.
E le gata i tapaau ae o faleupolu, sa auai mai i itumalo e fia o Samoa, e tapuaia le faafotu tupu o le suafa Faumuina Le Tupufia.
O itu e fia o le suafa i ona suli ma ē tau i le gafa, sa auai e molimauina lea foi aso faitaulia i le talafaasolopito o le itumalo o Faleata, ae le gata i lea o Samoa.
O le sauniga lotu e faapaiaina ai le nofo sa taitaia e le Susuga i le Faifeau Toeaina ia Misi Palauni, ae lagolagosua iai faafeagaiga o Ekalesia i totonu o le itumalo.
O le lauga o le aso ina ua maea le faatau a le Itumalo ia Ale, Ulu, Une ma Manuleleua ma tootoo o le Itumalo sa tulai i le faatau a faleupolu, na fetalai ai le Tofa ia Ulu Kini.
O le Tofa Palusalue Faapo II ma le Afioga ia Taefu Lemi ma Faalavaau Toni mai le Aiga Tauaana na fa’ae’eina papa o le Faumuina ina ua maea le lauga a Ulu.
Na saunoa le Afioga Letelesa Elena Faumuina e momolia aloia mai le nofo, na ia saunoa foi i le faatalanoaga ma le au tusitala ma le au faasalalau, e faapea ua loa o aganoa le suafa mo se sa’o o le aiga, peitai, e lei tuuaunoaina ai le aiga sa iai lava i latou sa tausia e ala i le faiva o le tautua.
“O lea lava sa tausi lava e Le Usoalii ma Tama Pa’a, ae o a’u lea sa i totonu lava o le aualuma e faafoea le aualuma ma fesoasoani i le pule mamalu a Alii ma Faipule.”
Na ia faailoa foi na pau le tulaga na le mafai ona faaauauina, o ni matai, ona e lē mafai ona fai ni matai seiloga e nofoia le nofoa.
Sa ia taua o se fiafiaga tele i lo latou aiga ina ua maua le nofo, o le a faapea ona faia iai le tautua, ma o le a toe faanofo lelei ai fo’i lo latou aiga.
Sa ia faaalia ua autasi lo latou aiga i suli o Paovale ma Masi lea sa auai uma i le faamoemoe.
