Aso Gafua 20 Ianuari 2025. Ua faaali se finagalo o le Taitaifono a le Faatuatua i Le Atua Samoa ua Tasi, e leai so latou faamoemoe e faatino se palota poo se vote of confidence i le Maota Fono agai i le afioga i le Palemia, ae ua mae’a ona ia momoli se tusi i le Fofoga Fetalai e logo iai le gasegase o le FAST ma le aveesea o sui e toaono mai le pati.

O se finagalo lea o le Taitaifono a le FAST le afioga ia Laaulialemalietoa Leauatea Polataivao Fosi Schmidt, i se feiloiga ma tusitala i le nofoaga autu i Tuanaimato I le Aso Gafua 20 Ianuari.
O le vaiaso na te’a nei sa faasalalau faalauaitele ai se faaiuga a le Vaega Faaupufai o le FAST, ua latou le toe faatuatuaina le taitaiga a le afioga ia Fiame, ma palotaina ai e le toa 20 o Sui Faipule le aveesea o le Palemia, Sui Palemia ma ni Sui Minisita e to’afā mai le vaega faaupufai.
Ae mo le tapena atu mo le fonotaga a le Palemene i le Aso Lua 21 Ianuari, sa tā’ua e Laauli, ua maea ona latou tuuina atu se tusi i le afioga i le Fofoga Fetalai, e ta’u iai le latou faaiuga ua faate’a Sui Faipule e toa 6 mai le FAST.
Ua talitonu le Taitaifono, ua le toe iai se patī a le afioga i le Palemia ia Fiame Naomi Mataafa, faapea le Sui Palemia ia Tuala Iosefo Ponifasio, ma afioga i alii Minisita ia Olo Fiti Vaai, Leatinuu Wayne Fong, Faualo Harry Schuster ma Toeolesulusulu Cedric Schuster.
O se feiloaiga fo’i a le Palemia ma le Taitai o le Itu Agai ia Tuilaepa Sailele Malielegaoi, ua saunoa Laauli, o lona talitonuga e le o se tulaga talafeagai ma atagia mai ai ua agai atu Fiame e sui lana pati.
Saunoa Laauli, “What happens to an MP who no longer belongs to a political party?”
Peitai o le faaiuga ua autasi iai Sui Faipule e toa 20 o le FAST, o loo teena malosi e le Palemia ma le Sui Palemia, faapea afioga i alii Minisita e toafa.
O le talitonuga a le Palemia ma Sui Minisita, e lē faavaea le aveeseina o i latou, ma o loo tumau pea lo latou avea ma sui o le pati, sei vagana ua latou faamavae, pe aumai se tali mai le Faamasinoga e faamautinoa ai le aveesea o i latou.
Ua saunoa fo’i Laaulialemalietoa, e le tulaga lena e oo iai le mataupu, o le fesili i le Faamasinoga.
I se finagalo o le Taitaifono o le FAST, o se snap election poo le toe fo’i o Samoa i se faigapalota tele, na saunoa Laauli e latou te lē lagolagoina lena tulaga ona e pa’ū le mamafa i le atunuu.
“O ai e tigaina? O le atunuu. O le a toe amo fo’i e le atunuu le isi avega, ma poloka ai le atiina’e o le tamaoaiga o le atunuu..”

“O loo tele galuega faaPalemene e tatau ona agai atu iai o le a poloka uma, e pei o le Tulafono o Faigapalota ma isi tulaofono taufaaofi o lea ua oo atu iai galuega a le Maota, ae o le a poloka..”
Ua lē mautonu le atunuu poo lea se tulaga o le a tula’i mai pe a tauaofia le Maota o le Palemene i le asō, Aso 21 Ianuari 2025 e tusa ai ma le gasegase ua matauina i totonu o le faigamalo ae maise le vaega faaupufai o loo tula’i mai i le foe.

Ae ua saunoa Laauli, “O le a taoto atu i aao o le Fofoga Fetalai o le Maota i lana galuega fai ma lona finagalo e tusa ma ala o le tulafono.”
Na saunoa fo’i le tamaitai Palemia i lana feiloaiga ma le autusitala i le vaiaso ua te’a nei, o lona tofi Palemia, e na o le Palemene e mafai ona aveesea.
Public Notices





Vacancies

- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025














