E lē Figofie Tapenaga Don Bosco i lenei Tausaga, ona ua Fai si Umi e le’o Toe Faia ni Tu’uga Fautasi

E lē faigofie tapenaga a le Don Bosco i lenei tausaga ona ua fai si umi tele ona lē o toe faia ni tuuga fautasi.

I se faatalatalanoaga ma le Susuga i le Kapeteni o le Don Bosco le afioga ia Vaimasenuu Zita Martel na ia saunoa ai e le faiofie le filiga o le latou au i lenei taisaga.

E 46 le latou ‘au alo i luga o le vaa, ae o le aofai o le latou togalauapiga e 80, e aofia ai ma le fanau teine e toafā o loo auai ai lava ma finau mo se latou avanoa i le foe.

“E lē faigofie mo a’u lenei tausaga, ona ua fai si umi e lē o toe faia ni fa’agatama i le tai.”

Saunoa Vaimasenuu e lē gata i le talavou uma o le fanau o loo ia aoaoina nei, ae fou uma foi i le faagatama.

“Ua leai foi nisi tuai sa alo i le fautasi a Don Bosco e fesoasoani mai mo le aoaoina o le fanau ia e fou mai i le tomai..”

“O le 17 agai i le 19 tausaga le toatele o le fanau o loo auai i toleniga, ma o se agaga faagaeetia ma faaloto tele o le vaaia lea o fanau o loo iai le agaga tauivi ma le lē faavaivai.”

O le afioga ia Vaimasenuu, e le tau faailoaina lona sao ma lona foi tala’aga i le taaloga lenei o fa’agamea i le tai.

O Vaimasenuu o se uluai kapeteni tamaitai lea o le faagatama i le tai. E le gata i lea, ae sa ia taitaia le auvaa a le Segavao, lea sa manumalo i le tuuga fautasi mo le faamanatuina o le 50 tausaga o le tutoatasi a Samoa i le tausaga 2012.

“E leai lava se kapeteni e le fia malo i lenei faamoemoe, ae ua manatu foi Don Bosco, sei fai sona sao i le faamanatuina o le tutoatasi o si o tatou atunuu.”

O le Aso Faraile, Aso 26 o le masina o Me o le a faataunuu ai le tu’uga fautasi e pei ona tapena atu iai le faamoemoe.

(1531)