E manatu le tina o Faoliu Tupua Wendt, o le faatauaina o le aia tatau o le itupa o tina ma tamaita’i, e pei o lea e una’i mai atunuu i fafo, peitai i lona lagona o soo se tagata soifua lava na faia e le Atua, e tofu ma le aia tatau.
“Ua leva ona saini e lo tatou malo le tulafono fo’i lea e faamuta ai le faailoga tagata i le itupa o tina, o lona uiga, ua leva ona silafia le mea e tatau ona iai, leaga soo se tagata soifua lava e iai lona aia tatau;
“Ia ae fai mai fo’i la tatou aganuu o le tuafafine o le i’oimata o le tama tane, a tatou o fo’i i le finagalo o le Atua, o loo manino le tala ia Atamu ma le faamoegaseina e le Atua, ma toese le ivi ina ia faia le tina. Ma o ia o le fesoasoani, e faufautua i le itupa o tama, e tele lava la sao o le itupa o tina.”
Sa saunoa le tina ia Faoliu Tupua Wendt i le auai atu ai o ia e fai ma malo fa’aaloalogia o le polokalame fa’amanatu o le aso Faavaomalo mo Tamaita’i poo le International Womens Day sa faafoeina e le Matagaluega o Tina ma Tamaitai i le Aso Faraile ua mavae atu nei.
O le lagona o le tina ia Faoliu sa avea ma se sui o le faalapotopotoga o le Mapusaga o Aiga mo ni tausaga se tele.
O lona lea tiute sa feagai ai ao iai i lea faalapotopotoga o le taumafaiga e fofo faafitauli o le sauaina o tina, o le mataupu tau i aia tatau, o le puipuia o aia tatau a alo ma fanau aemaise aia tatau a e e iai aafiaga tumau o le soifua.
Na ia faapea mai ai, “Ua sasao faaafi le tele o mea ua tulai mai, ma e iai lava lo’u talitonuga, o le tele lava o tagata o loo iai le talitonuga foi lea, o tina e leai ni a latou aia tatau.”
Na faailoa e Faoliu o aia tatau a tina e pei lava o tagata uma, e tatau ai ona ia maua se soifua saogalemu, ma ola fiafia, e faapena foi i le fanau, o le tofi mai le Atua.
“O lona uiga soo se tagata lava na faia i foliga o le Atua e iai lana aia tatau e soifua manuia ai”.
Sa faailoa e le tina o le ala lava lea e agai mai ai le tulafono pe a fasiotia pe sauaina foi se tina, aua e tatau ona manatua o le atunuu lenei e Faavae i le Atua.
“A tatou o fo’i i le aganuu, fai mai e leai ni tatou aia tatau, ae a manatunatu pe aisea na maua ai le “Malae o le Ma” i Savaii…Aisea?….Faailoga lena e au le inailau a tina. Aua nei galo, o tatou lea e faaauauina gafa o aiga.”
O le tina o Faoliu e atoa nei i le masina o Me le 74 o tausaga o lona soifua, sa ia faailoa o la latou galuega sa fai a’o iai i le Mapusaga o Aiga o le agai lea i tua e faailoa le tulafono ina ua maea ona saini lima ai Samoa ma malo aufaatasi e taumafai e faamalosia le tafi ese le mafaufauga, e leai ni aia tatau a tina.
