“E fautuaina pea le atunu’u ina ia fa’atāua le saogālēmū, a’o feagai ai ma fiafiaga o le amataga o le tausaga fou

0
54
Ata Pueina: Leota Marc Membrere, Gvt Press.

Tusia: Tusiga Pesetā Taofiga

E mauāluga atu soligātulafono ma fa’alavelave tutupu fa’afuase’i o le Kerisimasi o lenei tausaga 2023, fa’atusatusa atu i le Kerisimasi o le tausaga ua mavae 2022.

I fa’amaumauga a le Matāgaluega o Leoleo, Falepuipui ma le Ola Toe Fuatā’ina, o lo’o latou fa’amauina ai mai le Aso To’ana’i, 23 Tesema 2023 se’ia o’o atu i le Aso Tofi, 28 Tesema 2023, e 80 matā’upu na lipotia atu i le Matāgaluega, e aofia ai ma le fa’alavelave fa’afuase’i na tupu mai i Nofoāli’i.

Fa’ailoa manino e le afioga i le Komesina o le Matāgaluega iā ‘Au’apa’au Logoitino Filipo i le feso’otā’iga ma le Savali, mai ia matā’upu e 80, e 44 i latou na molia ma taofia mai e le Matāgaluega, i soligātulafono e aofia ai le ‘ave ta’avale onā, fa’ao’olima, fa’ao’o manu’a tugā, uumia o lā’au fa’asāina, lafo o ‘upu taufa’amata’u, lafo o fa’a’upuga fa’alumaluma, gaoi ma isi.

O le to’atele o ‘ave ta’avale onānā, na maua lava i poloka a Malu o le Mālō fa’apea ai ma a latou galuega petolō (Breathalyzer), o lo’o fa’asolo lava i aso ta’itasi.

Peita’i e na’o le tasi lava le maliu na fa’amauina mai lea va i piriota, o lo’o masalomia na malemo, o se ali’i mai le afio’aga o Nofoali’i.

O lo’o fa’amauina fo’i mai le Matāgaluega e pei ona fa’ailoa mai e ‘Au’apa’au, e ui i nei soligātulafono ma fa’alavelave tutupu fa’afuase’i ua lipotia ma fa’amauina, peita’i e le’o i se tulaga ogaoga tele lenei fuainumera.

Ua fa’ailoa manino fo’i mai fa’amaumauga a le Matāgaluega, o le va i tausaga o lo’o matuā a’afia i nei soligātulafono, o le 17 tausaga aga’i atu i le 45 tausaga le mātutua.

A’o aga atu ai mo le fa’amanatuina o le aulia ma le manuia o le Tausaga Fou 2024, ma ona aso mālōlō, ua toe momoli mai ai le fa’amanatu ma le tu’itu’i pea a le Matāgaluega o Leoleo, Falepuipui ma le Ola Toe Fuatā’ina, ina ia utagia e Samoa aoao, le fa’atāua o le soifua saogālēmū ma malu puipuia, ina ia ‘aua ne’i i ai se soifua e ma’imau, a’o feagai ai ma fiafiaga o le amataga o le tausaga fou.

“E fautuaina pea le atunu’u ina ia fa’atāua le saogālēmū, ma ia ‘alo ‘ese mai le fa’atinoina o ala fa’asolitulafono.

“E tele ona a’afiaga, ma e avatu fa’afautuaga fo’i i le mamalu o le atunu’u le mata’itūina pea o le saogālēmū i luga o auala tetele, o le sami aemaise i taimi o fiafiaga ma tafaoga.”

Ata Pu’eina: Leota Marc Membrere.


Tusiga Taofiga