O le afioga ia Muagututagata Anesi Faalafi, 59 tausaga mai le afioaga o Malie, na manumalo i le taavale o le Ford Ranger, o le faailoga autu a le lulu a Tama Tuai a Malisi (Marist Brothers Old Pupils Association).
O Muagututagata e toatolu ona alo, e matua lona atalii e 27 tausaga, sosoo lona afafine 24 tausaga, ae sosoo ai loa ma lona atalii 12 tausaga sa la auai atu i le aso o le se’i.
O le aso tonu lava sa faataunuu ai le se’iina o le lulū a Malisi i le taeao o le Aso Faraile, sa fai ai fo’i le faaipoipoga a si ona afafine toatasi, 24 tausaga.
Na saunoa Muagututagaga, e mo’i sa iai le latou taavale, peitai, e faafetai ia Malisi ua mafai ona ia tietie i se taavale taugata faapea.
“O le a faa’aoga ma le tatau lenei faamanuiaga ae o se meaalofa e manatua ai lo’u afafine o le a tuufaatasia i le sauniga o le sakalameta paia, e faia nei i le itula e 4..”
Saunoa foi Muagututagata, e 97 le aofai o ana pepa na faatauina e tai $1 talā.
“Ae o lenei ua ou manumalo ai i lenei taavale e silia ma le $150,000 tala.”
O le faailoga lona lua e $10,000 na manumalo ai le tina o Motusaga Isaia o Falelasiu, ae o le faailoga lona tolu e $5000 na Sola lea ma le tina o Uno Seiuli mai le afioaga o Malie.
E toa lima nisi foi sa faamanuiaina i credit poo top up card e $500.
O le Peresitene o le Asosi Tama Tuai a Malisi le afioga ia Tuatagaloa Aumua Ming Leung Wai, na saunoa e momoli le faafetai i le atunuu mo le lagolago e ala i le faatauina o pepa lulū, faapea foi ma kamupani sa lagolagoina lenei faamoemoe.
Na maualuga foi le sauniga i le auai atu ai o malo e pei o le afioga ia Tuiatua Tupua Tamasese Efi faapea le au valaaulia na auai ai.
