E 933 le Aofai o le Fanau na auai i le Suega Ulufale mo le Kolisi o Samoa

0
2794
Samoa College Principal Karene Faasisila and Deputy Principal Patricia Golovale-Reupena. File phot 📷 SGN.

O le Aso Faraile na mavae atu nei sa molimauina ai le faatumulia o matua ao tapuaia le fanau sa feagai ma suega ulufale mo le Kolisi o Samoa i Vaivase-Tai.

I se faatalanoaga ma le Pule Aoga le susuga ia Karene Faasisila, na ia saunoa ai e 948  le aofai o le fanau sa resitala, ae 933 le faitau aofai sa sue i le suega ulufale i lea aso.

“A faatusatusa atu i le tausaga talu ai, e tutusa lelei lava le fainumera, e 933 foi le aofai o tama ma teine sa su’e i le 2021.”

Tā’ua e le Susuga i le Tamaitai Pule Aoga, e fua lava le aofai o avanoa mo tamaiti e mafai ona faamanuiaina i le fainumera o vasega mo le Year 9.

O lenei fainumera e fua i le lima (5) o Vasega 9 (Year 9 level), ae faatapulaa i le 36 tamaiti i le vasega e tasi.

O lea la e maua ai se fainumera e tusa ma le 180 ni avanoa mai le 933 o tamaiti o loo naunau mai mo se avanoa i le Kolisi o Samoa.

SGN file photo. E toa 933 le fanau aoga ma sue i le suega ulufale, Kolisi o Samoa.

E lua mataupu sa suesueina ai le fanau, e pei ona masani ai i tausaga taitasi. O le Gagana Peretania, ma le Matematika.

Saunoa le Tamaitai Pule e faafetaia le mamalu o matua ona o le taupati mamao mai e aumai a latou fanau. O se tulaga faanaeetia e maitauina i tausaga uma.

O nisi o matua e malaga mai afioaga mao tua i Upolu nei, aemaise o nisi e malaga mamao mai i le motu tele o Salafai.

E faitau afe le tapuaiga a matua sa nofo tatalo ao alo atu le fanau i suega. Kolisi o Samoa 2022.

“E lagona lava le faagaeetia i le toatele o nai matua e naunau mo le faaaogaina o le fanau i le Kolisi nei. O le pine lea o le iai pea o le faatuatuaga ma le talitonuga o le atunuu i le Kolisi o Samoa, ae o matou nei ua na o ni tagata faatauvaa..”

O le Susuga i le Tamaitai Pule ia Karene Faasisila ua tolu nei tausaga talu ona avea ma Pule Sili ae ua silia ma le 20  tausaga o ia galue o se faiaoga i le Kolisi o Samoa.

E 35 le aofai o le aiga faiaoga, faaopopo iai ma failautusi ma nisi o loo galulue i le fale tusi (libarians) lea atoa ai le 39.

Saunoa Ms Faasisila, e maea loa le faigasuega, ona alo atu loa lea o le vasega faiaoga e togi pepa suega uma nei e 933.

O se galuega tele le faatulagaina o le fanau i tomai o le Egilisi ma le Matematika e pei ona iai.

O se aso oi luma ona faasalalau aloaia lea o le lisi ma faalauiloa ai suafa ma aoga o le fanau ua faamanuiaina.

O le Aso 13 o Tesema e taualuga ai galuega faaleaoaoga o lenei tausaga poo le laugatogi a le kolisi.