O le Aso Faraile, 26 Me 2023, ua fuafua e fa’apāia ai mo le fa’aāogaina le $60 tupe Samoa fou, e agiagia ai le aulia manuia e Samoa o lona 60 tausaga.
O se pine fa’amau lea, o le malosi o le agalelei lavea’i o Le Atua iā Samoa ma ona tagata, e ui e tele lu’itau ma fa’afitauli o le faigāmalaga peita’i o lo’o ta’ita’i tama pea i le soifua ma le ola.
Ua fa’ailoa manino e le Ofisa Sili o Pulega o le Matāgaluega a le Palemia, le afioga Agafili Tomaimano Shem Leo, o se itula fa’aaoauli po’o le afiafi, ua fuafua e fa’ataunu’uina ai le fa’apāiaina o lea seleni mo lona fa’aāogaina.
O se itu e iloga ai le aulia manuia e Samoa o le 60 tausaga talu ona tuto’atasi ma pulea e ona lava tagata si o tatou atunu’u.
O le aotelega o lenei fuafuaga lelei a le Mālō o le a mafai ona folasia i le aso tonu o le a fa’atinoina ai lenei fa’amoemoe tāua.
O lea $60, o le a manatua ai pea lenei tuto’atasi, aemaise o se ulua’i taimi ua fa’agasolo ai polokalame ta’itasi mo le tausaga atoa auā le samiga o lo tatou 60.
(600)
