E 5 Poloka ta’i Afa Eka sa Totoina ai Laau Faasaina e 10,964

0
1615

O se faasalaga faafalepuipui e ono tuuina atu e le faamasinoga maualuga i le alii o Tuanai Ioka, 39 tausaga o Leone, Solosolo ma Aufaga lea sa maua atu e leoleo o galue i se maumaga mariuana e tusa ma le 10,964 laau sa iai. O le uumi o laau e tai 1 le mita i le 2 mita.

I faamaumauga a leoleo, e lei faaipoipo lea alii, ma e le faigaluega fo’i.

O le asõ lea na faatulaga mai e tolaulau ai le faaiuga a le faamasinoga e tusa ai o moliaga o loo faasaga atu ia te ia, e pei ona ia ioeina i le faamasinoga i le aso 13 o Tesema 2019.

E 1 le moliaga o le totoina o laau faasaina o le mariuana, 1 le moliaga o le umiaina o le laaumalosi, 1 le moliaga o le umiaina o le laau malosi e lei laiseneina, ma le 1 le moliaga o le umiaina o pulufana e lei laiseneina.

O loo iai foi moliaga muamua o lea alii i le solitulafono lava lenei o le umiaina o laau faasaina i le 2011.

I tolaulauga a leoleo o loo faaalia ai o le aso 8 o Novema 2019 i le 6:30 i le taeao, sa faatinoina ai se suesuega a leoleo i le afioaga o Faleatiu, i le fanua sa masalomia o loo faia ai ni faiga faasolitulafono.

O lea taeao, ina ua oo atu leoleo i Faleatiu, sa savalia se togavao ma tau atu i le faatoaga lea sa vaaia ai le o loo molia ma nisi o tane e toalua i le fale lea e i totonu o le faatoaga lea.

Na pu’e e leoleo Tuanai Ioka, peitai na sosola le isi toalua.

O le faatoaga muamua lea, e 5 ni poloka o togalaau mariuana ma o poloka taitasi ia e tai afa eka i le poloka.

O le aofaiga o laau sa totoina i luga o le fanua lea e tusa ma le 10,964. O le uumi o laau e tai 1 le mita i le 2 mita. O le 8% o laau e sili atu i le taitasi mita le uumi.

Sa maua foi laau malosi e lei laiseneina faapea ai ma pulufana i totonu o le fale i luga lava o le fanua lea sa tutu ai le ua molia ma nisi tane e toalua.

E 2 pulufana o le ituaiga o le 12, 1 le pulufana o le ituaiga o le 22, 1 le pulu o le fana ituaiga 303.

O ia ituaiga pulufana e faapea e 8 ituaiga pulu o le ituaiga 308, 3 pulu o le ituaiga 303,1 pulu o le ituaiga 243.

Sa teena e Ioka moliaga ia ua tuuaia ai o ia ina ua fesiligia e le tamaitai faamasino ia Mata Tuatagaloa pe iai ni itu o le tolaulauga a leoleo na te teena.

“Lau afioga i le faamasino ou te tete’e i mea ia ua tuuaia ai a’u, ae lei maua mai le aualii sa’o e onaina faatoaga, o a’u na ave i utā e vaaia ma faafaigaluega i le maumaga, na avatu a’u i le Aso Tofi, ae o atu leoleo i le Aso Faraile”

Na fesiligia e le tamaitai faamasino pe o le a toe tetee o lea sa ioe muamua i ona moliaga. O le isi tulaga o lea na ia ioeina na alu atu o iai mariuana ma sa nofo ai lava i le fanua lea.

Sa faailoa atu fo’i e le alii loia a le itu a leoleo ia Quentin Sauaga, “E foliga mai sa iloa lelei lava e le o loo molia faatoaga mariuana ma afai e tetee o le a valaau e le itu a leoleo ana molimau.”

Ae sa faailoa mai e le tamaitai faamasino…”Ou te le o manatu o tetee le alii ua molia ae o loo tetee i le tulaga e iai isi tagata e toalua e onaina faatoaga nei.”

Sa faailoa e le tamaitai faamasino ia Tuanai Ioka, “O le vaega o le tulafono lea e aumai ai oe o lea na maua atu oe ii i le togā mariuana, o lea na e alu atu a e vaai o laau mariuana ma le toga mariuana ae ete lei toe alu ese mai ai lava.”

Sa tali mai lea alii, o lona fefe ina nei fasi o ia e le alu alii e onaina le toga mariuana.

Sa faailoa e le tamaitai faamasino, ua maea faia faamatalaga a ona matua i le vaega o faanofovaavaia mo se ripoti e faatatau i lona tagata.

O le faamatalaga a lona tina, e seasea alu atu Tuanai i lo latou aiga i Solosoloe ona e tele lava i Faleatiu, ma a alu atu foi e tumu se faleoo e iai i tupulaga talavou. Saunoa Mata o lona uiga o lea e faatau ai mariuana ii.

Ua toe tolopo le lauina o le iuga o lea alii seia tilotilo le faamasinoga i folasaga a le itu a leoleo ua tuuina atu.

O loo nofo taofia ai pea Tuanai Ioka i le vaaiga a leoleo seia aulia le aso 10 o Fepuari i le 12.30 i le aoauli e toe valaauina ai.


Maina Vai