E tolu ni faalavelave tugā na lipotia atu, ma o loo faia iai suesuega a leoleo. O nei faalavelave e aofia ai se alii mai le atunuu o Saina sa maua atu ua maliu i lona potu, o se tama e 43 tausaga o loo leiloa i le sami mai fagotaga, faapea se tamaitai sa taofia i lalo o le vaavaaiga a leoleo i Tanumalala.
Sa faailoa mai nei faalavelave e le Sui Komesina o Leoleo i se feiloaiaga ma le vasega o tusitala i le aoauli o le Aso Lulu 28 Ianuari 2026.
O faalavelave e lua ua matuinoa ai le maliu, ma o loo faaauau iai suesuega a leoleo, ae o le tamā sa agai atu e fagota, e toe tasi le aso atofaina mo le galuega tau saili a leoleo ma le FESA (search and rescue) lea sa faatino talu mai le po o le Aso Faraile.
Maliu o le Tagatanuu Saina
I le Aso 23 o Ianuari 2026, na lipotia mai ai le maliu o se alii tagatanuu Saina e 46 tausaga le matua.
O lenei alii na maua atu ua maliu i le mea o loo faigaluega ai i se fale pisinisi i Vaitele.
“Na maua atu o ia ua maliu i se potu i le nofoaga o loo faatino ai lana galuega..”
“I suesuega muamua a leoleo, e lei mafai ona faamaonia o se solitulafono na aafia ai lona soifua. Sa iloiloina foi ata o le CCTV faapea ma molimau sa iai.”
Leiloa se Tamā ao Fagota:
O se tamā e 43 tausaga le matua mai Tiavea ma Samusu sa agai atu ma isi e toatolu e fagogota i le po o le Aso Faraile, 23 o Ianuari 2026.
Saunoa le Sui Komesina o Leoleo, na faalavelaveina le fagotaga i timuga mamafa ma galu tetele.
Na mafai lā ona toe fo’i mai ma faasaoina le toatolu, ae e lei fo’i mai le tamā e toatasi.
Ua 4 nei aso o le galuega laveai sa galulue faatasi ai Leoleo ma le FESA. Sa iai foi ma le au aau loloto (divers) i sailiga.
“Peitai e oo mai i le taimi nei e lei faamanuiaina.”
O loo faaauau pea suesuega ma sailiga, ae a siliga loa, ona toe fai lea o se isi faaiuga pe faaauau pea.
“I le tulaga loulouā o le tau, ua avatu ai se lapataiga i le au fagota i lenei vaitau..
Saunoa Leiataua, e malamalama o loo faatinoina galuega mo le sailiga o meataumafa mo aiga, ae ao lava ona siaki muamua le tau mo le saogalemu.
Maliu o Papalii Sia
O le tamaitai ia Papalii Sia Figiel sa maliu ao taofia ai i lalo o le vaavaaiga a leoleo i le falepuipui i Tanumalala e tālia ai le iuga o lana faamasinoga.
“O le taeao o le Aso Gafua, i le va o le itula e 6 ma le 7, na logoina ai le Komesina e le aufaigaluega, ua maliu lea tamaitai..”
Saunoa Leiataua, na ave o ia i le falemai i Faleolo ma faamaonia ai lona maliu.
O Papali’i sa taofia o ia i le vaega o tamaitai, ma sa nofo toatasi i lona potu mo lona saogalemu, faapea le saogalemu o isi tamaitai o loo tāofia.
Sa lata ane lona potu i le isi potu o loo iai tamaitai e toalima.
Saunoa le SuiKomesina, “I suesuega muamua, e lei maua se faamaoniga o se solitulafono na mafua ai lona maliu.”
Ua poloaiina se taotoga faapitoa, ma o loo i lalo pea le tino maliu i le vaavaaiga a leoleo e tusa ai ma tulafono.
Na faai’u le saunoaga a le Sui Komesina e faafetaia le lagolago a le atunuu, aemaise le Minisita o Leoleo ma le Afioga i le Palemia, i le lagolago malosi i galuega a leoleo, e le gata i le tetee atu i fualaau faasāina, ae faapea foi le tausisia ma le faamalosia o tulafono uma.
- Little Rina Wins Inaugural Measina Festival Fautasi Race - September 3, 2026
- Miss Taumeasina Island Resort Inspired by Her Grandparents - September 2, 2026
- Lise Marie Schmidt Pleads Guilty to Misleading Police with Damaging Lies about Samoa’s then Prime Minister Hon Fiame Naomi Mata’afa - September 2, 2026
