E 28 Pagota i Tanumalala sa Aafia i le Misela

0
688
Tanumalala prison

28 Novema 2019.  Ua faailoa mai e le tamaitai Sui Komesina o le falepuipui ia Levaopolo Rosa Siaosi  e le o iai se isi o aafia i le misela i Tanumalala i le taimi nei, ae o le 3 i le 4 vaiaso talu ai na taofia ai ni pagota se toafa i le falemai i Motootua, ae 28 le aofai sa maua i le faamai.

O le Aso 30 Oketopa sa logoina ai le tamaitai Sui Komesina e leoleo o le falepuipui, o loo iai le pagota 32 tausaga le matua ua aafia i le misela ma ua tigaina foi.

Sa momoli faavavevave atu loa lea alii ma taofia ai i le falemai i Motootua. I lea taimi, sa pisia ai foi ma le isi toa 16 o pagota mai lea lava potu.

Sa taua e Lavaopolo, e mafua ona o le taimi nei, o  oo atu lava i le tai 50 tagata e taofia i le potu e tasi i le falepuipuip.

Tanumalala prison cell blocks

E te’a atu i tua le pagota lea e 32 tausaga ae auina atu foi le isi to’atolu i le falemai ma taofia ai.

O lea loa taimi na tusi mai ai loa le pulega o le falepuipui i le matagaluega o le soifua maloloina, e manaomia le tui o le misela mo le falepuipui.

E oo mai i le aso 9 o Novema, lea na taunuu atu ai loa le team a le health mo le faagasologa o tui, ua 10 pagota o loo aafia pea i le misela.

Sa faailoa e Levao e 28 le aofai o ē na aafia i totonu o le piliota o le 2 vaiaso, ae lē ogaoga tele e pei o le toafā lea na taofia i le falemai.

“Na laki a matou ona e taunuu mai le vaega o le health ae omai foi ma fomai Ausetalia lea na muamua lava taunuu mai i lea vaiaso;

“Ma sa fai ai loa le tonu, o le potu atoa lea na iai tagata e toasefuluona sa aafia, o le a fai loa ma se potu faapitoa e isolate iai matou cases;

“O le matautia o le faamai lenei, e te iloa mai foliga o le toafa lea sa taofia, ina ua te’a atu i tua, na matua iloa lava le telē o le suiga i foliga.”

Saogalemu pagota i le misela

Na faailoa mai foi e Levaopolo, sa faatonutonu lava ma fautuaina ia e fomai Ausetalia, faapea le vaega mai le Matagaluega o le Soifua Maloloina.

Sa fautuaina le mataala ma ia inu lava fualaau panadol e tai fa itula ma ia lava le vai malulu mo pagota.

O le tulaga i asiasiga sa faia foi se tonu a le pulega i lea aga masani a le falepuipui.

“O le aso 7 o Novema na taofia ai loa asiasiga uma, ona o le mafaufau sa iai, ia contain pea le virus i totonu iinei;

“Aua foi e oo atu lava i le 600 tagata e asia le falepuipui i le vaiaso; ma o asiga na, e tele ina omai ma aumai tamaiti, o fanau e omai e asi tama poo tina ia e taofia i le falepuipui.”

File photo: O le tatalaina o le falepuipui fou i Tanumalala

Sa taua e Levaopolo, sa oo foi i Aso Sa i tua (weekend release) sa latou taofia foi i lena lava taimi.

“O lea o le a 2 masina talu ona taofi asiga ma weekend release.”

O le falepuipui e tusa ma le 20 pagota e agavaa mo le Aso Sa i tua i masina taitasi mai faasalaga mama, ae sa taofia uma lava ia vaega.

Na faailoa e le tamaitai Sui Komesina o le falepuipui, ana le vave le fuafuaga lea, faapenai ua sasao faaafi le misela i le falepuipui i Tanumalala.

“O le taimi nei la, ua leai se misela o toe iai, poo se tasi o toe aafia o pagota o le falepuipui i le taimi nei.”

Pau le tulaga sa taua e le tamaitai, ua aoga tele le falepuipui fou ma lona nofoaga fou ua fesoasoani tele i le recovery a e na aafia.

“Ana o Tafaigata e toatele tagata e aafia ona e le lelei le ea, e pumo’omo’o potu e taofia ai tagata.”

Na pau le tulaga sa alofa iai o meaai, ona o pagota e fua lava taumafa e ave iai, ae o le tulaga o le faama’i lenei, e tatau ona lelei le tausiga ma ia lava taumafa maloloina ma paleni e tau faaitiitia ai le tupu pea o le vairasi i le tino.

Saunoa Levao e faafetaia fomai sa latou fesoasoani ma avatu fautuaga.

“Faafetai i fomai sa o’o atu mai le Malo o Ausetalia faapea tatou foi fomai mo le faailoa atu o auala e faatino ai le basic care, lea sa matou taumafai ai le tausiga o pagota na aafia.”


Maina Vai

Maina Vai of Fasitoouta is a mother of five. Maina has recently graduated with a Certificate of Customary Adjudication from the National University of Samoa.
Maina Vai