E 11 Ofisa Sili na Faatautoina mo Matagaluega Eseese o le Malo

0
946

E sefulu ma le tasi Ofisa Sili na aloaia le faatautoina i le taeao nei, mo matagaluega eseese o le Malo.

O se sauniga puupuu na taitaia e le Susuga ia Rev. Dr Latu Latai, o le faafeagaiga EFKS Apia, ona sosoo ai lea ma le faatutoga o Ofisa Sili.

O le Tamaitai Palemia, le Afioga ia Fiame Naomi Mataafa, na saunoa i le saunoaga autu.

Saunoa Fiame, “O la outou tautoga o loo ua i luma o le Atua. Ou te manatu ua maua lo outou tomai masani e faatino ai tiute e tusa ma ala o le tulafono. Ua outou lava tapena ma lava ta oso i tofiga ua valaauina ai outou.”

“O le faamanatu ia tautuana la outou auaunaga ma le tautua mo le atunuu, ia malu, ia mapo, o le tatou anava lena ia tatou faiva e mamanu faatasi ina ia manuia Samoa ma ona tagata.”

” Ia manuia lo outou valaauina.”

O Faauluuluga nei o Matagaluega na faatautoina:

  • Matagaluega o Aoga ma Aganuu – Aeau Chris Hazelman
  • Ofisa o Suesuega Faa-Saienisi a Samoa – Fiso Dr. Fiame Leo
  • Matagaluega o Tupe Maua ma Tiute – Fonoti Talaitupu Li’a Taefu
  • Ofisa Sili/Failautusi o le Komisi o Galuega a le Malo – Kolone Tikeri
  • Faalapotopotoga o Faaputugatupe mo le Lumanai Manuia o Tagata Samoa (S.N.P.F.) – Lemalu Selesitina Puleaga Meni-Reti
  • Faletupe o Atinae – Mua’autau Raie Silipa
  • Faalapotopotoga o Fale a Samoa – Sautiamaivasa Titimaea Tiotio
  • Auaunaga o Vaa a Samoa – Tafesilafai Ipiniu Filipo
  • Komesina o le Ofisa o Faigapalota – Tuiafelolo Alexander John Stanley
  • Public Trustee – Tuitoga Christina Angela Te’o Faitele
  • Sui Pule Sili Iunivesite Aoao o Samoa – Tuifuisaa Patila Amosa.

O le sauniga i le taeao nei na molimauina le faatumulia i aiga ma uo, o sui o matagaluega eseese o le Malo, faapea sui o le Palemene, Kapeneta, faapea le Ao Mamalu o le Malo, lana Afioga Tuimalealiifano Vaaletoa Sualauvi II.